Англиялик мутахассис Фрэнк Лэмпард Лондоннинг “Челси” жамоаси бош мураббийига айланди. Бу ҳақида “аристократлар” расмий сайти маълум қилди.

Лэмпард “Челси”да яқинда истеъфога чиқарилган Грем Поттер ўрнини эгаллади. Фрэнк мавсум охирига қадар жамоа мураббийи сифатида ишлайди. Шунингдек, Эшли Коул, Жо Эдвардс ва Крис Жонслар мураббийлар штабидан жой олади.

Қайд этиб ўтиш жоиз, лондонликларни жорий мавсум учинчи мураббий бошқариб боради. 2022/23 йилги мавсум бошида Томас Тухель жамоа мураббийи бўлган бўлса, унинг ўрнини сентябрь ойида Поттер эгаллади. Орадан 7 ой ўтиб, Фрэнк Лэмпард “Челси” бошқарувига келди.

Эслатиб ўтамиз, Фрэнк Лэмпард фаолиятида иккинчи бор “Челси” бош мураббийи сифатида ишлайди. Бунга қадар 44 ёшли мураббий 2019 йилдан 2021 йилга қадар “аристократлар” мураббийи бўлган.

Англиялик мутахассис футболчилик фаолияти давомида 2001 йилдан 2014 йилга қадар “аристократлар” сафида тўп сурган. У Лондон клуби таркибида умумий ҳисобда 648 та учрашув ўтказиб, 211 та гол урганди ва клуб тарихида энг яхши тўпурарга айланган.