Чемпионлар лигаси чорак финал босқичидан ўрин олган "Бавария" ҳамда "Манчестер Сити" ўртасидаги баҳс бугун 12 апрелга ўтар кечаси "Etihad Stadium"да бўлиб ўтади. Шунингдек, бугун чорак финалнинг яна бир ўйинида "Бенфика" ўз уйида "Интер"ни қабул қилади.
Англия ва Германия чемпионлари ўртасидаги баҳс, албатта, ҳар жиҳатдан Чемпионлар лигасида куннинг марказий ўйини ҳисобланади. Хосеп Гвардиола ва Томас Тухель ўртасидаги ўзига хос қарама-қаршилик ҳамда Эрлинг Холанднинг немис клуби билан навбатдаги учрашуви. Норвегиялик олдинги босқичда "Лейпциг"га қарши пента-трик қайд этган. Жоау Канселу ва Лерой Сане эса ўзининг собиқ жамоасига қарши майдонга тушади.
Йўқотишлар
Рақиблар бу учрашувда оптимал такибда иштирок этиши қийин. Айниқса, “Бавария”да бир неча кун олдин ҳужумчи Эрик Шупо-Мотинг сафдан чиқди. Устига-устак, Люка Эрнандес, Нойер ва Тель ҳам бугунги ўйинда қатнаша олмайди. Улар анча аввал сафдан чиққанди. "Шаҳарликлар" таркиби нисбатан оптималроқ. Катта йўқотишлар деярли йўқ.
Сўнгги ўйин
Жамоалар бу ўйинга яхши кайфият билан келяпти. Чунки ҳар икки клуб ўз миллий чемпионатларида охирги ўйинда муваффақият қозонди. "Манчестер Сити" "Саутгемптон"га сафар уюштириб, йирик 4:1 ҳисобидаги ғалабага эришган бўлса, "Бавария" меҳмонда "Фрайбург"дан минимал ҳисобда устун келди.
Имкониятлар ҳақида
Кўпчилик ушбу беллашув олдидан Гвардиола шогирдлари фаворит, деб ҳисобламоқда. Ҳаттоки, мюнхенликлар устози Томас Тухель ҳам бу фикрни қўллаб-қувватлади. Англия клуби бир неча йилдан буён азалий орзуси йўлида курашиб келмоқда. Бунга баъзан жуда яқин келди, аммо ҳар сафар уларга нимадир етишмади. Наздимда, ўша етишмаган жиҳат "Сити"да ҳозир бор. Бу - Эрлинг Холанд. Вазиятлар кўп яратадиган "Сити" катта учрашувларда ўйин томонлама устун бўлиб ҳам имкониятни бой берган ҳолатларнинг кўп бора гувоҳи бўлганмиз. "Викинг" айни мана шу муаммони ёпиш учун, ўзида бўлган 1 та имкониятдан 1 та гол уриш учун жамоага олиб келинган. "Бавария" учун Де Брюйне ва Холанд тандеми хавф туғдиришини тахмин қиляпман.
"Бавария"нинг имкониятлари қайси жамоага қарши бўлмасин доим баланд бўлиб келган. Тўғри, кичик устунлик "Сити"да. Бироқ "немис машинаси" ўз ўйинини топиб олса ва рақиб уларнинг прессингига бардош бера олмаса, якун қандай бўлишини ўзингиз биласиз. Таркибдаги йўқотишлар ҳам у қадар муаммо эмас. Сабаби, мюнхенликларда бир-бирини ўрнини тўлдирувчи футболчилар кўп. Шу ҳолатда ҳам кўплаб юлдузлар захира ўриндиғида қолиб кетмоқда. 
Хуллас, бугун бизни супер қарама-қаршилик кутиб турибди. Қайси жамоа ғалаба қозонишини тахмин қилиш қийин. Бироқ супер ўйин бўлишини бемалол тахмин қила оламиз!
