Chempionlar ligasi chorak final bosqichidan o‘rin olgan "Bavariya" hamda "Manchester Siti" o‘rtasidagi bahs bugun 12 aprelga o‘tar kechasi "Etihad Stadium"da bo‘lib o‘tadi. Shuningdek, bugun chorak finalning yana bir o‘yinida "Benfika" o‘z uyida "Inter"ni qabul qiladi.
Angliya va Germaniya chempionlari o‘rtasidagi bahs, albatta, har jihatdan Chempionlar ligasida kunning markaziy o‘yini hisoblanadi. Xosep Gvardiola va Tomas Tuxel o‘rtasidagi o‘ziga xos qarama-qarshilik hamda Erling Xolandning nemis klubi bilan navbatdagi uchrashuvi. Norvegiyalik oldingi bosqichda "Leypsig"ga qarshi penta-trik qayd etgan. Joau Kanselu va Leroy Sane esa o‘zining sobiq jamoasiga qarshi maydonga tushadi.
Yo‘qotishlar
Raqiblar bu uchrashuvda optimal takibda ishtirok etishi qiyin. Ayniqsa, “Bavariya”da bir necha kun oldin hujumchi Erik Shupo-Moting safdan chiqdi. Ustiga-ustak, Lyuka Ernandes, Noyer va Tel ham bugungi o‘yinda qatnasha olmaydi. Ular ancha avval safdan chiqqandi. "Shaharliklar" tarkibi nisbatan optimalroq. Katta yo‘qotishlar deyarli yo‘q.
So‘nggi o‘yin
Jamoalar bu o‘yinga yaxshi kayfiyat bilan kelyapti. Chunki har ikki klub o‘z milliy chempionatlarida oxirgi o‘yinda muvaffaqiyat qozondi. "Manchester Siti" "Sautgempton"ga safar uyushtirib, yirik 4:1 hisobidagi g‘alabaga erishgan bo‘lsa, "Bavariya" mehmonda "Frayburg"dan minimal hisobda ustun keldi.
Imkoniyatlar haqida
Ko‘pchilik ushbu bellashuv oldidan Gvardiola shogirdlari favorit, deb hisoblamoqda. Hattoki, myunxenliklar ustozi Tomas Tuxel ham bu fikrni qo‘llab-quvvatladi. Angliya klubi bir necha yildan buyon azaliy orzusi yo‘lida kurashib kelmoqda. Bunga ba’zan juda yaqin keldi, ammo har safar ularga nimadir yetishmadi. Nazdimda, o‘sha yetishmagan jihat "Siti"da hozir bor. Bu - Erling Xoland. Vaziyatlar ko‘p yaratadigan "Siti" katta uchrashuvlarda o‘yin tomonlama ustun bo‘lib ham imkoniyatni boy bergan holatlarning ko‘p bora guvohi bo‘lganmiz. "Viking" ayni mana shu muammoni yopish uchun, o‘zida bo‘lgan 1 ta imkoniyatdan 1 ta gol urish uchun jamoaga olib kelingan. "Bavariya" uchun De Bryuyne va Xoland tandemi xavf tug‘dirishini taxmin qilyapman.
"Bavariya"ning imkoniyatlari qaysi jamoaga qarshi bo‘lmasin doim baland bo‘lib kelgan. To‘g‘ri, kichik ustunlik "Siti"da. Biroq "nemis mashinasi" o‘z o‘yinini topib olsa va raqib ularning pressingiga bardosh bera olmasa, yakun qanday bo‘lishini o‘zingiz bilasiz. Tarkibdagi yo‘qotishlar ham u qadar muammo emas. Sababi, myunxenliklarda bir-birini o‘rnini to‘ldiruvchi futbolchilar ko‘p. Shu holatda ham ko‘plab yulduzlar zaxira o‘rindig‘ida qolib ketmoqda.
Xullas, bugun bizni super qarama-qarshilik kutib turibdi. Qaysi jamoa g‘alaba qozonishini taxmin qilish qiyin. Biroq super o‘yin bo‘lishini bemalol taxmin qila olamiz!
