Рикардо Кака келаси ойда Ироқ ва Японияга қарши кечадиган ўртоқлик ўйинлари учун Бразилия терма жамоасига таклиф этилди. Кака сўнгги марта терма жамоа сафида ЖЧ-2010 чорак финалида Голландияга қарши ўйинда тўп сурганди.

Бразилия терма жамоаси 11 октябрь куни Ироқ терма жамоаси билан Швецияда, орадан 5 кун ўтиб Япония терма жамоасига қарши Польшада куч синашади.

"Бизга терма жамоа учун жон куйдирадиган Кака каби футболчилар керак", дейди Бразилия бош мураббийи Мано Менезес. "У терма жамоага келади ва ўзининг яхши формада эканини кўрсатади, деб ўйлайман. Ушбу мавсум Кака учун муҳим аҳамиятга эга бўлади. Шунинг учун биз унга терма жамоа аъзоси сифатида ишонч билдирсак бўлади".

"Кака каби футболчилар нима қилиш кераклигини яхши билишади. Улар юқори савияда ўйнашни давом эттириш йўлини топишлари керак. Агар у кўпроқ ўйин амалиётига эга бўлса, биз уни Оскар билан бирга ўйнатишимиз мумкин. Кўрамиз, бу қандай самара бераркан", дейди мураббийи.

Ироқ ва Япония терма жамоалари ЖЧ-2014 саралашининг "В" гуруҳида иштирок этишмоқда. Япония октябрь ойидаги ўйинларда дам олса, Ироқ 16 октябрь куни Австралияни қабул қилади.

Бразилия терма жамоасининг октябрь ойидаги ўйинлар учун таркиби:
Диего Алвес (Валенсия), Жефферсон (Ботафого), Виктор (Атлетико Минейро), Даниел Алвес (Барселона), Марсело (Реал), Адриано (Барселона), Алекс Сандро (Порту), Тьяго Силва (ПСЖ) , Давид Луис (Челси), Деде (Васко), Леандро Castan (Рома); Сандро (Тоттенхэм), Паулинью (Коринтианс), Фернандо (Гремио), Жулиано (Днепр), Лукас (Сан-Паулу), Оскар, Рамирес (иккиси - Челси ), Тьяго Невес (Флуминенсе), Кака (Реал), Неймар (Сантос), Леандро Дамиан (Интернационал), Халк (Зенит).