Ўзбекистоннинг биринчи рақамли ракетка устаси Денис Истомин Пекин шаҳрида (Хитой) бўлиб ўтган “China Open” халқаро турнирининг жуфтликлар мусобақасида аргентиналик шериги Карлос Берлок билан бирга финалга қадар йўлни мағлубиятсиз босиб ўтиб, бош соврин учун кураш олиб борди.
Ушбу жуфтлик даставвал Максим Мирний (Белоруссия) / Даниел Нестор (Канада) дуетини 1-6, 6-3, 12-10 ҳисобида, иккинчи босқичда эса ҳиндистонлик Махеш Бхупати, Рохан Бопанна жуфтлигини 6-2, 7-6 ҳисобида мағлуб этиб, ярим финалга чиқишди.
Финалга бериладиган йўлланма учун британиялик Колин Флеминг ва Росс Хатчинс жуфтлигини 6-2, 6-3 ҳисобида енгган Карлос Берлок (Аргентина) / Денис Истомин (Ўзбекистон) дуети, ҳал қилувчи баҳсда америкалик машхур жуфтлик Боб ва Майкл Браянларга қарши баҳс юритишди.
Қизғин кечган баҳсда америкалик жуфтлик 6-3, 6-2 ҳисобида ғалабага эришди.
Қизиқ жихати, Пекин турнирида жуфтлик мусобақаларида финалга қадар етиб келган Денис Истомин ҳамда Карлос Берлок, эндиликда Шанхай шаҳрида бошланган Мастерс туркумига кирувчи халқаро турнирнинг яккалик баҳсларида бир-бирларига рўбаро келадилар.
Мукофот жамғармаси 3.240.000 долларни ташкил этган мазкур йирик халқаро турнир 14-октябрга қадар давом этади.
Шавкат Жалилов
Маданият ва спорт ишлари вазирлиги матбуот хизмати
