Ўзбекистон Республикаси Президентининг "Оммавий ва профессионал футболни ҳар томонлама ривожлантиришнинг қўшимча чора-тадбирлари тўғрисидаги қарори ижросини таъминлаш мақсадида ҳудудларда футболни ривожлантириш ва болалар футболидаги олиб борилаётган ишлар ва мавжуд камчиликларни таҳлилига бағишланган йиғилиш бўлиб ўтди.
Видеоанжуман шаклида ўтказилган йиғилишда ЎФА бош котиби Аваз Максумов, ҳудудий футбол ассоциациялар билан ишлаш бўлими бошлиғи Бахтиёр Ширинов, Болалар футболини ривожлантириш бўлими бошлиғи Маъмур Саидқосимов, Кадрлар бўйича бош мутахассис Олимжон Юлдашев, ҳудудий футбол ассоциациялар вице-президентлари, техник директорлар ва болалар футболига маъсул мутахасисслар иштирок этишди.
Кун тартибига кўра дастлаб ҳудудларда "Football for school's" - "Мактабларда футбол" дастури бўйича амалга оширилаётган ишлар ва келажакдаги режалар, ҳусусан амалий ва назарий семинар машғулотларини ёзги оромгоҳларда ўтказиш, ФИФА томонидан ишлаб чиқилган "Football for school's" мобиль платформаси бўйича семинар машғулотларини назорат қилиб бориш бўйича керакли кўрсатмалар берилди.
1-июн "Халқаро болаларни химоя қилиш куни" ва "Оммавий футбол" куни муносабати билан ўтказиладиган футбол фестивалларини ҳудудларда оммавий флешмоб тарзида умумтаълим мактабларида ўтказиш, нодавлат (хусусий) футбол мактаблари фаолиятини мувофиқлаштириш ва уларга кўмаклашиш, Ҳудудлардаги олий ўқув юртларида тахсил олаётган талабалар ўртасида "Талабалар лигаси" футбол тадбирларини ўтказиш, ҳудудий футбол академиялар ва футбол мактабларида амалга оширилаётган ишлар тўғрисидаги маълумотларни ҳудудий футбол ассоциациялар назорат қилиб бориш бўйича топшириқлар берилди. Йиғилиш якунида эса жорий йилнинг 13-18 май кунлари бўлиб ўтган "Спорт мактаблари футбол лигаси" Ўзбекистон чемпионати якунлари тахлил қилинди.
