“ПСЖ” ва “Манчестер Сити” бир ҳафталик фарқ билан ўз мамлакатларида чемпион бўлишди. Парижликлар ва "шаҳарликлар" кўп йиллар давомида ўз лигаларида ҳукмронлик қилмоқдалар, аммо нега улар орасидаги тафовут тобора кенгайиб бораётганга ўхшайди?
Сабаби арабларга қарашли икки клубнинг икки хил фалсафаси бордек. Манчестерда юлдузли жамоа қурилмоқда, лойиҳанинг марказида эса мураббий сиймоси турибди. Парижда эса юлдузлар жамоаси тузилади, у ерда мураббий ва энг қиммат ўйинчилар ўртасида мумкин бўлган зиддият юзага келган тақдирда, мураббий ишдан кетади.
Роберто Манчини инглизлар жамоасида тўрт мавсум, Мануэль Пеллегрини уч, Хосеп Гвардиола эса Манчестердаги еттинчи мавсумини якунлади. Французларда бутунлай бошқача ҳикоя бор: Карло Анчелотти бир йилу тўрт ойдан кейин, Унаи Эмери икки йилдан кейин, Томас Тухель икки ярим йилдан кейин, Маурисио Почеттино бир ярим йилдан кейин жамоадан кетди. Кристоф Галтье эса 10 ойдан сўнг деярли ҳайдаб юборилишга яқин. Фақатгина Лоран Блан учта тўлиқ мавсумда жамоани бошқарди холос. Аммо бу мураббий, киноя билан айтганда, Чемпионлар лигаси учун жамоа тузиш нуқтайи назаридан энг ноаниқ ва кучсиз шахс эди. Ҳар икки клуб ҳам ўз ғалабалари учун кўп пул сарфлайди. Жуда кўп. Албатта, “Ман Сити” юлдузлар билан шартнома имзоламайди дейиш аҳмоқлик бўларди. Аммо Гвардиола қўл остида шартнома имзолаган ҳар бир янги футболчи, шубҳасиз, мураббийнинг ўзига керак бўлган. Жумладан, "Сити"нинг янги супер юлдузи Эрлинг Холанд ҳам. Баъзи экспертларнинг таъкидлашича, у Пепнинг жамоаларига мос келмайди. Шунга қарамай, Гвардиола Холандга мослашди ва айрим ўринларда норвегияликни ўзининг "Ман Сити"сига кўниктирди.
Пеп Леони қанчалик севмасин, "Ман Сити" 35 ёшлик Серхио Рамос, Неймар ёки ҳатто Лионелни сотиб олишини тасаввур қила оласизми? Агар Гвардиолада тўсатдан ўз-ўзини клубдан ҳайдаш истаги пайдо бўлмаса, бу мумкин эмас. Ўтган ёзда "шаҳарликлар" сафига Криштиану Роналду таклиф қилинганди, бироқ чет эл ОАВнинг ёзишича, португалиялик юлдуз ва каталониялик мутахассис ўртасидаги суҳбатдан кейин бу трансфер амалга ошмади. Мураббий ҳужумчига базадан жой кафолатламаган. Аммо Криштианунинг "Манчестер Юнайтед"дан "ПСЖ"га ўтиши эҳтимолга яқин эди. Месси агар француз клубида бўлмаганида бу трансфер амалга ошган бўларди. Чунки Парижда кўргазмаларга эътибор кучли. Жамоа тузиш мантиғидан кўра бутун дунёнинг эътибори муҳимроқ. Балки улар мураббийнинг фикрини сўрамаган бўларди ҳам, чунки Роналдуга нисбатан Галтье қанчалик обрўга эга?
Гвардиола ўзининг ўйин тизимига мос жамоа яратди. Шу сабабли, "Ман Сити" Чемпионлар Лигаси кубогининг амалдаги ғолибига тўртта гол уриб, уларни мусобақадан чиқариб юборди. Пеп майдонда тўпсиз юрадиганларга таркибида имкон бермайди. "ПСЖ" эса мослашишга, юлдузларидан унумли фойдаланишга қўлдан келганча ҳаракат қилади. Битта Килиан Мбаппе яхши таассурот қолдирмоқда, аммо унинг икки шериги ишончларни тўлиқ оқлай олмаяпти. Хуллас, Мбаппе, Месси ва Неймар майдонда бўлса, парижликлар катта ўйинларда устунлик қилишолмайди. Мураббий Неймарни ҳам, Мессини ҳам захирага қўйолмайди - бу кийим алмаштириш хонасини "портлатади" ва қатарлик бошлиқлардан унинг гап эшитиши аниқ. Агар Гвардиола бугун "ПСЖ"да бўлганида, у худди шу шароитда худди Галтье ёки Почеттино каби синган бўларди.
Энг яхши ўйинчиларни йиғиш орқали "ПСЖ" Чемпионлар лигасини "Ман Сити"дан тезроқ ютиши мумкин эди - Париж клуби 2020 йилда финалга чиққан эди. Аммо шунга қарамай, аксарият ҳолларда араб хўжайинлари учун Чемпионлар лигаси 1/8 финал ёки чорак финалда якунланди. Бу объектив чизгилар. Парижликлар ўзининг Пепини йиллар давомида топиши керак, гарчи бироз қийинроқ бўлса ҳам. "Шаҳарликлар" охирги мавсумларда доимий равишда дунёнинг кучли 4 ёки кучли 2 жамоаси қаторида эътироф этилди ва Пеллегрини қўл остида улар ярим финалга қадар етиб боришгани ҳам эсингизда бўлса керак.
Яна бир буюк совет мураббийи Валерий Лобановский шундай деган эди: "Мен юлдузлар жамоасини тузмаяпман, мен юлдузлар жамоасини яратяпман". Шубҳасиз, худди шу тамойиллар Гвардиолага ҳам тегишли. "Ман Сити" бошлиқлари эса ақлли ишлашади, улар ҳар қандай футболчидан кўра кўпроқ мураббийга, унинг фалсафасига ишонишган.
