БАА ва Ўзбекистон миллий терма жамоалари ўртасидаги ўртоқлик учрашувидан кейин матбуот анжумани ўтказилди. Унда Миржалол Қосимов қуйидагиларни таъкидлади.

— Ўртоқлик ўйини нуқтаи назаридан биз учун яхши ўйин бўлди. Боиси, баъзи ўйинчиларнинг ҳолатини кўздан кечириш, ўйинчиларнинг ўзаро тушунувчанлигини таъминлаш асосий вазифамиз эди. Шунинг учун бу ўйин биз учун жуда муҳим аҳамиятга эга бўлди. БАА ҳам яхши жамоа. 16 октябрь куни Қатарга қарши кечадиган ўйин олдидан яхши учрашувни ўтказдик деб ўйлайман.

— Ўзбекистон терма жамоаси фақат 2та гол ўтказиб юборганидан кейин яхши ўйнай бошлади. Унгача жамоа гол кутганмиди?
— Бугун БАА терма жамоаси яхши ўйин кўрсатди. Уларнинг таркибида яхши ёш ўйинчилар бор.  Улар келажакда яхши футболчига айланишади, деб ўйлайман. Биз ҳимоядаги ўз хатоларимиз эвазига гол ўтказиб юбордик. Муҳим ўйинларда эса бундай хатоларга йўл қўйишимиз керак эмас. Бундай хатоларнинг ўртоқлик ўйинларида юз бергани яхши, машғулотларда айнан шуларнинг устида ишлаймиз.

— Ўзбекистон Осиё кубоги-2015 саралаш босқичида ҳам БАА билан бир гуруҳда ўйнайди. Бу ҳолат сиз учун қулай ҳисобланадими?
— Бу мусобақа келаси йили бошланади. Бизни эса 3 кундан кейин ЖЧ саралаш ўйини кутиб турибди. Дастлаб биз ўша ўйин ҳақида бош қотиришимиз керак. Фикримча эса, Осиё кубоги саралаш гуруҳида биринчи ўринни эгаллаш учун икки жамоа ўртасида баҳс кетса керак.