"Интер" ҳужумчиси Лаутаро Мартинес "Барселона" устидан қозонилган ғалабани мавсумнинг бурилиш нуқтаси деб ҳисоблайди.

Октябрь ойида “нерадзуррилар” гуруҳ босқичидаги ўйинда “кўк-анорранглилар”ни мағлуб этиб (1:0) якунда 1/8 финалга чиқди ва каталонияликларни Европа лигасига тушириб юборди. Симоне Индзаги шогирдлари кутилмаганда финалга чиқди ва унда "Манчестер Сити"га қарши майдонга тушади.

“Ўшанда биз ҳамма нарсага эришишимиз мумкинлигини, бизда жуда аҳил жамоа борлигини англадик”, - дейди аргентиналик футболчи “Барселона” устидан қозонилган ғалаба ҳақида. "Порту" ва "Бенфика"га қарши плей-оффда жуда қийин дамларни бошдан кечирдик, аммо "Милан" билан ярим финалда биз рақибларимиздан сезиларли даражада устун эдик деб ўйлайман", - дея "Интер" ҳужумчисининг сўзларидан иқтибос келтиради Football Italia.