Ёзнинг биринчи кунида Барселонада Жорди Альба билан хайрлашиш маросими бўлиб ўтди. 34 ёшли ҳимоячи асосий жамоадаги ўн бир мавсумдан сўнг клубни тарк этади. Бу вақт ичида Альба 459 та ўйин ўтказиб, 27 та гол урди ва 99 та голли узатмани шерикларига берди.

Альба фаолиятини Португалияда давом эттириши мумкин. Журналист Педро Сепулведанинг ижтимоий тармоқларда ёзишича, "Бенфика" тажрибали испан ҳимоячиси билан музокара бошлаган.

Эслатиб ўтамиз, “Бенфика” “Порту”ни икки очкога ортда қолдириб, Португалия чемпионига айланди. Лиссабон жамоаси келаси мавсумда Чемпионлар лигаси гуруҳ босқичида иштирок этади.