Испания ОАВлари Мадриднинг «Реал» клуби ҳимоячиси Дани Карвахаль иштирокидаги қизиқарли вазиятга эътибор қаратди. Тажрибали ҳимоячи «Бетис»га қарши ўйинда захира ўриндиғида ўтириб, ўз рақобатчиси Трент Александер-Арнольднинг ҳаракатларидан очиқчасига норозилигини ифода этган.

The Touchline нашри тарқатган видеолавҳаларда кўринишича, ўйиннинг бир вазиятида Трент ҳужумдан ҳимояга қайтишда сусткашликка йўл қўйган. Тўп айнан унинг қанотида бўлиши ва рақиб хавфли ҳужум уюштираётганига қарамай, инглиз футболчиси ортга қайтишга шошилмаган. Бу ҳолатни кузатиб турган Карвахаль бармоқлари билан Трентнинг «секин юриши»ни тақлид қилиб кўрсатган.

Эслатиб ўтамиз, «Реал» жума куни «Бетис» билан баҳсда дуранг (1:1) ўйнаб, муҳим очколарни бой берди. Айни дамда «қаймоқранглилар» турнир жадвалида пешқадам «Барселона»дан 11 очкога ортда қолмоқда.