Бугун Жанубий Корея Кей-лигасида 36-турнинг қолдирилган учрашуви бўлиб ўтди. Унда «Поханг Стилерс» ўз уйида ОЧЛ ярим финалида «Бунёдкор»га рақиблик қиладиган «Улсан Хёндэ»ни қабул қилди ва Ким Де Хо, Асамоа, Парк Сонг Хонинг голлари эвазига 3:1 ҳисобида ғалаба қозонди. Корея матбуоти таърифича, «шундоқ ҳам йўли тирбанд бўлган» «Улсан Хёндэ»  бу мағлубиятдан кейин 4-ўринни «Поханг»га бўшатиб берди.

Ушбу мағлубиятдан кейин «Улсан Хёндэ» бор эътиборини ОЧЛга қаратадиган бўлиб турибди. Ўйиндан кейинг матбуот анжуманида «Улсан» бош мураббийи Ким Хо Гон: «Биласизки, 4 нафар етакчи футболчиларимиз ҳозир терма жамоа ихтиёрида бўлиб туришибди. Шундай бўлса-да, таркибдаги қолган футболчиларим яхши ҳаракат қилишди. ОЧЛ ва Кей-Лига тақвимини бирданига «хазм қилиш» қийин кечса-да, тайёргарликни кучайтирамиз», дея сўз бошлади. Бош мураббий «Ўйин ҳақидаги фикрларингиз билан ўртоқлашинг», деган саволга: «Кўрдингиз, футболчиларимиз бор кучларини бериб ўйнашди. Лекин мағлуб бўлдик. Хатолар устида ишлашимиз керак», дея жавоб қайтарди. «Ҳужумкор футболчиларимиз терма жамоа билан бирга. Шунинг учун ҳужумда баъзи муаммолар юзага келди. Биринчи бўлимда тўп узатмаларида жуда кўп хато қилдик. Аммо иккинчи бўлимда сал изга тушгандек бўлди. Кейинги турда «Чонбук»ка қарши майдонга тушамиз. Муаммолар жуда кўп. Айниқса, марказий ҳимоядан ташвишдаман. Бу ёғига осон ўйин бўлмайди».

Отабек Йўлдошев, Жанубий Корея, Сеул