“Насаф” – “Пахтакор” учрашувидан кейинги матбуот анжуманида дастлаб тошкентликлар устози иштирок этди.

Мурод Исмоилов: -Бугун мавсумнинг энг муҳим учрашувларидан бирини ўтказдик.  Учрашув кутилганидек анча қийин кечди. Футболчиларимга раҳмат айтаман ажойиб учрашув учун. Биринчи бўлимдаги тезкор голларимиз учрашув тақдирини ҳал этди. Ростини айтганда, бунчалик тез голларни киритишимизн  биз ўзимиз ҳам кутмаган эдик. Барча жамоамиз мухлисларини ушбу ғалаба билан табриклайман.

-Жамоангиз бугун жуда яхши ўйнади. “Насаф” жамоаси қайси жиҳатларда бугун ўзини кўрсата олмади, деб ўйлайсиз?

- Учрашувни дастлабки қисмида биз рақибга нисбатан яхшироқ ўйнадик. Иккинчи бўлимда эса, “Насаф” бизга етарлича ташвиш туғдирди.  Аммо “Насаф” яратилган имкониятлардан унумли тарзда фойдалана олмади. Шу жиҳатларда “Насаф” бугун оқсади. Менимча, бугун биз рақибга ўйнаш имконини яратиб бермадик. “Насаф” бу қаршиликка дош бера олмади, назаримда. Шунингдек, “Насаф”нинг камчиликларидан бири бу дарвоза томон аниқ зарбаларнинг камлигида бўлди.

- Сиз аввал “Насаф” таркибида ўйнагансиз. Ҳозирги жамоа билан олдинги даврни солиштирганда, қандай фарқларни сездингиз?

- Аввало, клуб инфратузилмаси борасида катта фарқни сезиш қийин эмас. “Насаф”да яратилган шароитлар юксак даражада. Куч жиҳатдан олиб қараганда, аввалари ҳам “Насаф” етакчи жамоа бўлган ва ҳозир ҳам шундай. Яна шуни қўшимча қилиш мумкин, жамоада ҳақиқий етакчи футболчи йўқ. Олдинлари “Насаф”да Сергей Лебедев, Нўъмон Ҳасанов сингари етакчи футболчилари бўлган.