«Сурхон» — «Сўғдиёна» учрашувидан (1:0) сўнг Сергей Сергеевич матбуот анжуманида иштирок этиб, журналистлар саволларига жавоб берди.

"Ўйин қийин ва асабий ўтди, бунинг устига баҳс якунида ўйинга 14 дақиқа қўшиб берилди. Жисмоний ва руҳий томондан кўп куч сарфладик. Агар таймлар ҳақида гапирадиган бўлсак, биринчи бўлимда кўпроқ тўпсиз ҳаракат қилиб, ҳимояга кўпроқ этибор бердик, иккинчи таймда эса рақиб дарвозаси олдида кўплаб вазиятлар яратдик. Ўйин нега қийин ўтди? Биринчидан, рақиб яхши ҳаракат қилди, иккинчидан, ўйинлар орасидаги фарқ катталиги ўз таъсирини кўрсатди" — дейди Сергей Арсланов.

— Нега Нимели ўйинга қўшилиб кета олмади?
— Биринчи бўлимда у роса қийналди. Ҳар доим ҳимоядан ҳужумга ўтишда ҳужумчилар тўпни сақлаши, тўпга чиқиши ҳақида гапирамиз. У шундай ҳаракат қилишга уринди, аммо рақиб бунга имкон бермади. Иккинчи бўлимда эса унга вазиятлар этишмаган бўлсада, Нимели ҳимоя ва ҳужум ўртасидаги боғловчи вазифасини бажариб берди. Айнан у туфайли ҳимоядан чиқиб, хавфли вазиятлар ярата бошладик. Ҳа, у чарчаб қолди. Майдонга иккинчи ҳужумчи тушиши ўйинимизни кучайтира олди. Уларнинг бири тўпни сақлаган бўлса, иккинчиси рақибни алдашга ҳаракат қилди. 20 кундан сўнг расмий баҳсда майдонга тушиш нафақат футболчиларга, балки мураббийларга ҳам қийин.

— Нимелига қизиқиш катта. Айниқса "Навбаҳор"дан...
— Нимели чемпионатимизнинг энг яхши ҳужумчиларидан бири саналади. Топ-клублар унга ҳақиқатдан ҳам қизиқиш билдиришмоқда. Улар раҳбариятимизга мурожаат қилиб, бу борада музокара ўтказишлари мумкин.

— «Сурхон»нинг трансфер шорт-листида кимлар бор?
— Ҳозир уларни саралаб, ўйинимизга мос келишини кўриб чиқяпмиз.

— «Сурхон» легионер олмоқчими ёки маҳаллий футболчи?
— Клубимиз биринчи навбатда ёшларга этибор қаратади. Кейин эса турли ёшлардаги терма жамоа вакилларини олиб келишга интиламиз. Сўнгги вариант — легионер. Айни дамда легионерлар бўйича барча позицияларимиз банд. Шу сабабли улар ҳақида ўйлаётганимиз йўқ.