«Surxon» — «So‘g‘diyona» uchrashuvidan (1:0) so‘ng Sergey Sergeevich matbuot anjumanida ishtirok etib, jurnalistlar savollariga javob berdi.

"O‘yin qiyin va asabiy o‘tdi, buning ustiga bahs yakunida o‘yinga 14 daqiqa qo‘shib berildi. Jismoniy va ruhiy tomondan ko‘p kuch sarfladik. Agar taymlar haqida gapiradigan bo‘lsak, birinchi bo‘limda ko‘proq to‘psiz harakat qilib, himoyaga ko‘proq etibor berdik, ikkinchi taymda esa raqib darvozasi oldida ko‘plab vaziyatlar yaratdik. O‘yin nega qiyin o‘tdi? Birinchidan, raqib yaxshi harakat qildi, ikkinchidan, o‘yinlar orasidagi farq kattaligi o‘z ta’sirini ko‘rsatdi" — deydi Sergey Arslanov.

— Nega Nimeli o‘yinga qo‘shilib keta olmadi?
— Birinchi bo‘limda u rosa qiynaldi. Har doim himoyadan hujumga o‘tishda hujumchilar to‘pni saqlashi, to‘pga chiqishi haqida gapiramiz. U shunday harakat qilishga urindi, ammo raqib bunga imkon bermadi. Ikkinchi bo‘limda esa unga vaziyatlar etishmagan bo‘lsada, Nimeli himoya va hujum o‘rtasidagi bog‘lovchi vazifasini bajarib berdi. Aynan u tufayli himoyadan chiqib, xavfli vaziyatlar yarata boshladik. Ha, u charchab qoldi. Maydonga ikkinchi hujumchi tushishi o‘yinimizni kuchaytira oldi. Ularning biri to‘pni saqlagan bo‘lsa, ikkinchisi raqibni aldashga harakat qildi. 20 kundan so‘ng rasmiy bahsda maydonga tushish nafaqat futbolchilarga, balki murabbiylarga ham qiyin.

— Nimeliga qiziqish katta. Ayniqsa "Navbahor"dan...
— Nimeli chempionatimizning eng yaxshi hujumchilaridan biri sanaladi. Top-klublar unga haqiqatdan ham qiziqish bildirishmoqda. Ular rahbariyatimizga murojaat qilib, bu borada muzokara o‘tkazishlari mumkin.

— «Surxon»ning transfer short-listida kimlar bor?
— Hozir ularni saralab, o‘yinimizga mos kelishini ko‘rib chiqyapmiz.

— «Surxon» legioner olmoqchimi yoki mahalliy futbolchi?
— Klubimiz birinchi navbatda yoshlarga etibor qaratadi. Keyin esa turli yoshlardagi terma jamoa vakillarini olib kelishga intilamiz. So‘nggi variant — legioner. Ayni damda legionerlar bo‘yicha barcha pozisiyalarimiz band. Shu sababli ular haqida o‘ylayotganimiz yo‘q.