Бугунги учрашув якунлангач, ҳамкасбларимиз "Навбаҳор" мураббийи Мустафо Байрамовни саволга тутишди.

Мустафо Байрамов (“Навбаҳор” бош мураббийи): — “Локомотив” билан дуранг ўйнашни режалаштиргандик, аммо йигитлар умуман ўзига ўхшамади. Билмадим, уларга нима бўлганига ҳайронман. Биринчи бўлимда бошқа, иккинчи таймда умуман бошқача ўйин кўрдик. Футболчилар ўзларига яратилган вазиятлардан унумли фойдалана олишмади. Тажрибали дарвозабон Бугало барча зарбаларни қайтарди.

— Жамоанинг кейинги турдаги режалари қандай?
— Бизни қийин учрашувлар кутиб турибди. Турнир жадвалидаги ҳолатимиз мақтагулик эмаслигини жуда яхши биласизлар. Шу боис, қолган беллашувларда ғалаба қозонишга мажбурмиз.

— “Навбаҳор”да молиявий муаммолар йўқми?
— Йўқ. Бу борада ҳеч қандай муаммомиз йўқ.

— Пул томонидан муаммо йўқ экан, нега “Навбаҳор” зўр ўйнаб кетмаяпти?
— Чунки бизда жамоа ҳар йили янгиланади. Мавсум якунланганидан кейин “Навбаҳордан олти нафар ўйинчи кетса, уларнинг ўрнини саккиз нафари тўлдиради. Натижада футболчилар бир-бири тушуниб олишлари учун вақт керак бўлади. Шу билан мавсум ўтиб кетади.

Фурқатбек НИШОНОВ ёзиб олди