Ҳозиргина Қозоғистон чемпионатининг 26-тур ўйинлари ниҳоясига етди. Ушбу турда мусобақада 2 ва 3-ўрин эгалари номи аниқ бўлиши керак эди.

"Иртиш" клуби ўтган турда чемпионликни муддатидан олдин қўлга киритган "Шахтёр" клуби меҳмони бўлди. Улуғбек Бақоев ўйиннинг 7-дақиқасидаёқ чемпион дарвозасини ишғол қилишга муваффақ бўлди. Чап қанотдан етказиб берилган тўпни ўзбекистонлик ҳужумчи бош билан дарвозага жойлаб қўйди. Ўйин давомида ҳамюртимизда гол уриш учун имкониятлар бўлди, бироқ бу вазиятларда Улуғбек фойдалана олмади. Ўйиндаги ягона гол павлодорликларга ғалаба  билан биргаликда кумуш медалларни ҳам келтирди. "Иртиш" ҳисобидаги очколар сони 51тани ташкил қилди.

Улуғбек Бақоев эса 14та гол билан мавсумнинг энг яхши тўпурарига айланди. Эътиборли томони, Бақоев кетма-кет учинчи мавсумда ушбу унвонни қўлга киритмоқда. У 2010 йилда "Тобол" (18та гол), 2011 йилда "Жетису" (16та гол) жамоаларида ўзининг тўпурарлик қобилиятини намойиш қилган бўлса, ушбу мавсумда у "Иртиш" билан шундай совринн қўлга киритади. У 2004 йилда ҳам "Тобол" сафида мавсумнинг энг яхши тўпурари (22та гол) бўлганини инобатга олсак, Улуғбек 4 марта Қозоғистоннинг энг яхши тўпурарига айланганини кўришимиз мумкин.

Шунингдек, Бақоев сўнгги 3 йилдан бери медалларга эга бўлмоқда: 2010 йилда — олтин, 2011 ва 2012 йилларда — кумуш.

Қозоғистон Премьер-лигаси. 26-тур
"ШАХТЁР" - "ИРТИШ" - 0:1
Гол: Улуғбек Бақоев (7)