“Навбаҳор”нинг 1-даврада қайд этган статистик натижалари билан таништиришда давом этамиз.

Ўзингизга маълум, “лочинлар” давралар оралиғидаги танаффусга турнир пешқадами сифатида чиқиб кетишди. Маълумки, ғалаба қозонишда ўйинларда фаол ҳаракат қилган ўйинчиларнинг ҳам муносиб ҳиссалари бор.

Хўш, “Навбаҳор”нинг Сoca Cola Суперлигаси 1-даврасидаги баҳсларда кимлар энг яхшилар қаторидан жой олишди?

“Навбаҳор”нинг ортда қолган 13 та баҳсидан 8 тасида жамоа аъзолари Ўзбекистон Профессионал футбол лигаси (ЎзПФЛ) томонидан учрашувнинг энг яхши футболчиси, деб топилишди.

Қолган 5 та ўйинда рақиб ўйинчилари шундай эътирофга сазовор бўлишган. Аммо яна шуни ҳам таъкидлаш жоизки, ўша учрашувларнинг фақат 2 тасида жамоа мағлубиятга учраганди, холос.

Қолган ўйинларнинг 2 тасида “лочинлар” дурангга имзо чекишган, яна биттасида эса зафар қучишганди.

Ортда қолган баҳсларда “Навбаҳор”нинг 2 нафар ярим ҳимоячиси - 22 ёшли маҳоратли Остон Ўрунов ва 29 ёшли тажрибали Жамшид Искандеровлар  ЎзПФЛ томонидан  учрашувнинг энг яхши футболчиси деб топилишди.

Ўрунов 6 марта (!), Искандеров эса 2 марта комиссарлар томонидан энг яхши, дея эътироф этилишди.   

Бежизга Жамшид Искандеров “Гол+пас” тизимида 7 очко билан “Навбаҳор”да пешқадамлик қилмаяпти, Остон Ўрунов эса 5 та гол билан “лочинлар” тўпурари бўлиб турмаяпти. Ушбу эътирофларнинг ортида мазкур ўйинчиларнинг муносиб меҳнатлари самараси ётибди.

“Навбаҳор” ПФК матбуот хизмати.