“Navbahor”ning 1-davrada qayd etgan statistik natijalari bilan tanishtirishda davom etamiz.

O‘zingizga ma’lum, “lochinlar” davralar oralig‘idagi tanaffusga turnir peshqadami sifatida chiqib ketishdi. Ma’lumki, g‘alaba qozonishda o‘yinlarda faol harakat qilgan o‘yinchilarning ham munosib hissalari bor.

Xo‘sh, “Navbahor”ning Soca Cola Superligasi 1-davrasidagi bahslarda kimlar eng yaxshilar qatoridan joy olishdi?

“Navbahor”ning ortda qolgan 13 ta bahsidan 8 tasida jamoa a’zolari O‘zbekiston Professional futbol ligasi (O‘zPFL) tomonidan uchrashuvning eng yaxshi futbolchisi, deb topilishdi.

Qolgan 5 ta o‘yinda raqib o‘yinchilari shunday e’tirofga sazovor bo‘lishgan. Ammo yana shuni ham ta’kidlash joizki, o‘sha uchrashuvlarning faqat 2 tasida jamoa mag‘lubiyatga uchragandi, xolos.

Qolgan o‘yinlarning 2 tasida “lochinlar” durangga imzo chekishgan, yana bittasida esa zafar quchishgandi.

Ortda qolgan bahslarda “Navbahor”ning 2 nafar yarim himoyachisi - 22 yoshli mahoratli Oston O‘runov va 29 yoshli tajribali Jamshid Iskanderovlar  O‘zPFL tomonidan  uchrashuvning eng yaxshi futbolchisi deb topilishdi.

O‘runov 6 marta (!), Iskanderov esa 2 marta komissarlar tomonidan eng yaxshi, deya e’tirof etilishdi.   

Bejizga Jamshid Iskanderov “Gol+pas” tizimida 7 ochko bilan “Navbahor”da peshqadamlik qilmayapti, Oston O‘runov esa 5 ta gol bilan “lochinlar” to‘purari bo‘lib turmayapti. Ushbu e’tiroflarning ortida mazkur o‘yinchilarning munosib mehnatlari samarasi yotibdi.

“Navbahor” PFK matbuot xizmati.