Шахсий натижалар ҳар қандай футболчи учун жамоавий совринлар олдида ёқимли бонус ҳисобланади.
Машҳур Гиннесс рекордлар китобига киритиладиган натижа кўрсатиш эса футболчи учун ўз исмини тарихга муҳрлаб қўйишнинг яна бир ажойиб варианти. Қизиқ, футбол оламининг рекордлар дафтарида нима гап? Бу масалага алоҳида эътибор қаратган sports.ru сайти Гиннесс рекордлар китоби саҳифаларини варақлаб чиқди. Эслатма, олдинроқ газетамизда махсус сертификатли ва амалдаги рекордлар ҳақида маълумот бергандик. Бугун эса Гиннесс китобида қайд этилган натижалар (уларнинг айримлари кейинчалик янгиланган) ҳақида сўз боради.
Бугунги футболда Лионель Месси ва Криштиану Роналдуни ўзаро таққослаш учун мавзу ҳамиша топилади. Мисол учун, Гиннесс рекордлар китобига кириш борасида ҳам айнан аргентиналик ва португалиялик юлдуз ҳаммадан олдинда. Ҳозирги ҳолат бўйича айтсак, жаҳон рекордлари саноғи бўйича Лионель Месси асосий рақобатчисидан озгина олдинда - 41:40. Хуллас, Гиннес рекордлар китобининг расмий аккаунти томонидан берилган энг кўп рекорд ўрнатган 5 нафар футболчи рўйхатига қарасак, Месси 1-ўринда. Аргентиналик ҳисобида нуфузли маълумотнома китобига киритилган 41та натижа бор. Леонинг рекордлари хилма-хил. Дейлик, у ЧЛда 50та гол маррасига энг тез етишган футболчи сифатида китобдан жой олган. Маълумот учун, аргентиналик ҳужумчи турнирдаги 50-голини 24 ёшида нишонлаган. 2012 йили эса Месси ЧЛдан ўрин олган Леверкузеннинг «Байер» клубига қарши баҳсда «пента-трик» қайд этиб, турнирнинг 1та учрашувида энг кўп гол урган футболчи мақомини олди. Лионель шунингдек, Испания Ла Лигасидаги ўйинлар сони бўйича ҳам рекордчи ҳисобланади - нақ 520та!
Криштиану Роналду асосий рақобатчисидан узоқда эмас. Португалияликнинг 40та кўрсаткичи Гиннесс рекордлар китобида рўйхатга олинган. Криш жумладан, ЧЛда энг кўп гол урган футболчи ҳисобланади - 140та. Бундан ташқари, португалиялик 2016/2017 ва 2017/2018 йиллар мавсумларида ЧЛнинг қаторасига 11тадан ўйинида гол қувончини туйган. Португалия фахри 2018 йили ЖЧда «хет-трик» қайд этган энг ёши катта футболчи бўлганини ҳам айтиш ўринли. У Россия мундиалида Испания термасига қарши баҳсда 3та гол урганди 33 ёшу 130 кунлигида.
Кўп карра рекордчи футболчилар рўйхатининг кейинги қатори Роберт Левандовскига тегишли. Лекин польшалик голеадор Месси ва Роналдудан анча орқада. Рақамларда айтсак, Леваголнинг 9та натижаси рекордлар китобига киритилган. Қолаверса, у деярли барча рекордларини 2015 йили «Вольфсбург»га қарши кечган машҳур ўйинда расмийлаштирган. Эсингизда бўлса, Левандовски ўша баҳсга захирадан қўшилиб, қандайдир 9 дақиқа ичида «пента-трик» қайд этганди! Оддий айтганда, «Бавария»нинг собиқ ҳужумчиси бир уринишда энг тезкор «хет-трик» (3 дақиқа 22 сония), энг тезкор «покер» (5 дақиқа 42 сония) ва энг тезкор «пента-трик» (8 дақиқа 59 сония) муаллифи сифатида рекордчига айланганди.
Левандовскидан кейин Гиннес рекордлар китобига 5 марта кирган Килиан Мбаппе бор. Жумладан, Килиан «Олтин тўп» учун энг ёш даъвогар сифатида қайд этилган. Бинобарин, франциялик футболчи 18 ёшу 293 кунлигида олий индивидуал соврин учун номзодларнинг расмий рўйхатидан жой олганди. У шунингдек, муайян мавсум ЧЛ гуруҳ босқичида энг кўп гол урган футболчи ҳисобланади. Жаҳон чемпионати финалида кўп гол уриш бўйича рекорд ҳам Мбаппега тегишли. Албатта, эсингиздадир, у Қатар мундиали ҳал қилувчи учрашувини 3та гол билан безаганди.
Топ-5да Неймар ҳам бор. Бразилиялик ҳисобига 4та жаҳон кўрсаткичи ёзилган. У хусусан, Олимпиада ўйинларида урилган энг тезкор гол муаллифи ҳисобланади. Ней 2016 йили Гондурас термаси дарвозасини ўйиннинг 14-сониясида ишғол қилганди. Бразилиялик юлдузнинг «Барселона»дан «ПСЖ»га трансфери футбол тарихидаги энг қимматбаҳо келишув бўлиб турганини ҳам унутмаслик керак. Эслатма, Париж гранди ўшанда трансферга космик сумма - 222 млн. евро тўлаганди.
Д.АЛИМОВ тайёрлади
