Аббос Файзуллаев "Спартак" ва "ЦСКА" жамоалари ўртасидаги "Москва дербиси"нинг энг яхши ўйинчиси деб топилди.

Файзуллаев ўйинда катта кўламдаги ишни амалга оширди. Футболчимиз ўз дриблинги ва креатив ҳаракатлари эвазига нафақат ҳужумда доимий хавф туғдирди, балки ўйин охиригача коллектив ҳимояда ҳам қатнашди. Балки шунинг учун ҳам Федотов ўйин охиригача унга дам беришни хоҳламагандир.

Файзуллаевнинг чиройли ҳаракатлари, албатта, таҳсинга лойиқ бўлиб, бизда индивидуал кучли вингерлар доимо етарлича бўлган. Аммо уни бошқалардан ажратиб турадиган жиҳати - бу унинг юқори интеллекти. Буни тушуниш учун футболчимизнинг майдондаги тўпсиз ҳаракатланишига эътибор бериш керак.

Файзуллаев тактик жиҳатдан вингер қилиши керак бўлган ҳамма ишни тўғри қилади:

- тўп жамоасида пайти қанот бўйлаб кенг очилади;

- бўш зоналар яратиш учун инсайд сифатида қанотдан марказга киради;

- қарама-қарши қанотда тўпга рақиб эгалик қилаётганда марказга тушади;

- коллектив прессинг пайти ҳар доим рақиб ўнг қанот ҳимоячисини ёпади.

Кўплаб ҳужумкор футболчиларимиз прессинг қилиши керак бўлган футболчисини аниқ билишмайди ва энг яқин футболчини прессинг қилишади ёки умуман прессингда қатнашишмайди.

Мураббийлар журналист-экспертларимиз сингари фақат гол ва ассист санашмайди. Аббос ўзининг сермаҳсул ҳаракатлари ёки чиройли ўйини учун эмас, балки юқори интеллекти ва меҳнаткашлиги эвазига "ЦСКА" деб номланган механизмнинг ажралмас қисмига айланиб улгурди.