Abbos Fayzullayev "Spartak" va "SSKA" jamoalari o‘rtasidagi "Moskva derbisi"ning eng yaxshi o‘yinchisi deb topildi.

Fayzullayev o‘yinda katta ko‘lamdagi ishni amalga oshirdi. Futbolchimiz o‘z driblingi va kreativ harakatlari evaziga nafaqat hujumda doimiy xavf tug‘dirdi, balki o‘yin oxirigacha kollektiv himoyada ham qatnashdi. Balki shuning uchun ham Fedotov o‘yin oxirigacha unga dam berishni xohlamagandir.

Fayzullayevning chiroyli harakatlari, albatta, tahsinga loyiq bo‘lib, bizda individual kuchli vingerlar doimo yetarlicha bo‘lgan. Ammo uni boshqalardan ajratib turadigan jihati - bu uning yuqori intellekti. Buni tushunish uchun futbolchimizning maydondagi to‘psiz harakatlanishiga e’tibor berish kerak.

Fayzullayev taktik jihatdan vinger qilishi kerak bo‘lgan hamma ishni to‘g‘ri qiladi:

- to‘p jamoasida payti qanot bo‘ylab keng ochiladi;

- bo‘sh zonalar yaratish uchun insayd sifatida qanotdan markazga kiradi;

- qarama-qarshi qanotda to‘pga raqib egalik qilayotganda markazga tushadi;

- kollektiv pressing payti har doim raqib o‘ng qanot himoyachisini yopadi.

Ko‘plab hujumkor futbolchilarimiz pressing qilishi kerak bo‘lgan futbolchisini aniq bilishmaydi va eng yaqin futbolchini pressing qilishadi yoki umuman pressingda qatnashishmaydi.

Murabbiylar jurnalist-ekspertlarimiz singari faqat gol va assist sanashmaydi. Abbos o‘zining sermahsul harakatlari yoki chiroyli o‘yini uchun emas, balki yuqori intellekti va mehnatkashligi evaziga "SSKA" deb nomlangan mexanizmning ajralmas qismiga aylanib ulgurdi.