Италиянинг «Милан» клуби жамоанинг ёшлари таркибида ҳаракат қилаётган марокашлик Ҳошим Мастурни шу мавсумнинг ўзидаёқ Италия чемпионати ўйинларига «заявка» қилмоқчи. Бу ҳақда «Goal.com» нашри хабар тарқатди.
Италия чемпионати қоидаларига мувофиқ футболчи 16 ёшга тўлганидан сўнг А серияда ўйнаши мумкин бўлади. «Россонерлар» вице-президенти Адриано Галлиани лига раҳбарларини иқтидорли футболчининг жамоа таркибида шу мавсумнинг ўзидаёқ тўп суришига кўндирмоқчи.
Манбада маълум қилинишича, Индзаги устозлик қилаётган «Милан» ёшлар жамоаси ўйинини кузатган Массимилиан Аллегрига Мастурнинг ўйини маъқул келган.
Эслатиб ўтамиз, Ҳошим Мастурни «Милан» шу йилнинг ёзида «Реджане» клубидан сотиб олганди. Мастурнинг ота-онаси асли марокашлик. Лекин футболчининг Италия фуқаролигини тасдиқловчи паспорти ҳам бор. Шунингдек ўтган куни футболчи Италия ўсмирлар терма жамоасида ўз дебютини нишонлади.
Қуйида унинг Италия ўсмирлар терма жамоасидаги ва «Милан»даги дебюти туширилган видеолавҳаларни томоша қилишингиз мумкин.
