Тошкентдаги «Ўзбекистон» спорт мажмуасида футзал бўйича Ўзбекистон чемпионати 1-босқич 3-тур учрашувлари старт олди. 17 декабрь куни тур доирасидаги биринчи кун ўйинлари бўлиб ўтди. Кун қизиқарли ва томошабор ўйинларга бой бўлди ва ҳар бир жамоа керакли натижани қўлга киритиш учун бор кучлари билан ҳаракат қилишди.
Куннинг илк ўйинидаёқ кескин кураш кузатилди ва томошабинлар тўққизта голдан иборат учрашувга гувоҳ бўлишди. Ўйиндан аввал чемпионатнинг ўртамиёна жамоаларидан бири ҳисобланган «Пахтакор» дастлабки тўққиз ўйинда атиги бир очко ишлашга муваффақ бўлган Навоий вилоятининг «Строитель-Зарафшон»ни осонлик билан мағлубиятга учратиши тахмин қилинаётган эди. Бироқ бу борада навоийликларнинг фикри бошқача чиқиб қолди ва улар яна бир бор мағлубиятга учраш ниятида эмасликларини очиқ кўрсатишди. Бироқ, «Строитель-Зарафшон» биринчи бўлиб ҳисобни очганига қарамай, омад барибир пойтахтлик футзалчиларга кулиб боқди. Ўйин 5:4 ҳисобида «Пахтакор» фойдасига ҳал бўлди.
Ягона дуранг натижа «Когон» – «Нафис» ўйинида қайд этилди. Жамоалар ўзаро иккитадан гол алмашиб, ўз ҳисобларига биттадан очко ёзиб қўйишди. Ушбу ўйиндан аввал «Когон» мусобақа жадвалида 8-, «Нафис» эса 9-ўринни эгаллаб турганини ҳисобга олсак, дурангни ҳам салбий натижадан кўра ижобий натижа деб ҳисобласа ҳам бўлади.
Биринчи кун ўйинларининг марказий учрашуви Тошкентнинг «Локомотив» ва Чирчиқнинг «Максам-Чирчиқ» жамоалари ўртасида бўлиб ўтди. Қизиқарли баҳс 3:1 ҳисобида темирйўлчилар фойдасига ҳал бўлди. Ғалаба «Локомотив»га мусобақа жадвалидаги пешқадамликни сақлаб қолиш имконини берган бўлса, «Максам-Чирчиқ» 3-ўриндан бир поғона пастлади.
«Гулистон»ни 6:3 ҳисобида мағлубиятга учратган «Бунёдкор» кучли учликка ёриб кирди. «Ардус» ва «Турон-C» ўртасидаги баҳс эса амалдаги чемпионнинг йирик – 5:0 ҳисобидаги ғалабаси билан якунига етди. Қайд этиш жоиз, андижонликлар дарвозасига урилган голлардан бири Дилшод Раҳматов ҳисобига ёзилди. Шундай қилиб, у жорий чемпионатда урган голлари сонини 27тага етказиб қўйди.
ЎЗБЕКИСТОН ЧЕМПИОНАТИ, 1-БОСҚИЧ, 3-ТУР
17.12.2012, ДУШАНБА
ПАХТАКОР – СТРОИТЕЛЬ-З 5:4 (3:1)
ГОЛЛАР: Алан Аминов (8), Александр Картаузов (20), Денис Акбаров (14, 38) Зуҳриддин Зиёмуҳамедов (36) – Комилов Зайниддин (5), Умиджон Боратов (21, 31), Азизжон Аҳтемов (40).
КОГОН – НАФИС 2:2 (0:0)
ГОЛЛАР: Соҳибжон Набиев (29), Соҳиб Нарзуллаев (31) – Амир Азимов (21, 29).
ГУЛИСТОН – БУНЁДКОР 3:6 (1:2)
ГОЛЛАР: Адҳам Аъзамов (13), Нодир Сайфуллаев (27), Одил Тожибоев (39) – Жалолиддинов Оломиддин (2), Жавлон Искандаров (18), Ғулом Мамажонов (22), Абдулла Бўриев (33), Машраб Одилов (36), Суннат Куралов (40).
АРДУС – ТУРОН-С 5:0 (4:0)
ГОЛЛАР: Жамолиддин Шарипов (5), Шаҳзод Бўриев (11), Дониёр Раззоқов (14), Андрей Шлёма (12), Дилшод Раҳматов (31)
ЛОКОМОТИВ – МАКСАМ-ЧИРЧИҚ 3:1 (1:0)
ГОЛЛАР: Даврон Чориев (1), Нодир Элибоев (29), Фахриддин Самегов (29) – Николай Одушев (25)
Иккинчи кун ўйинлари
18 декабрь, сешанба
10:00 Строитель-З – Локомотив
12:00 Нафис – Ардус
14:00 Максам-Чирчиқ – Гулистон
16:00 Турон-С – Пахтакор
18:00 Бунёдкор – Когон
