"Вест Хэм" ҳужумчиси Майкл Антонио Англия терма жамоаси бош мураббийи Гарет Саутгейтнинг қарорларидан ҳайратда эканлигини билдирди.
Ямайкалик футболчининг сўзларига кўра, "Уч шерлар" устози "Вест Хэм"да ажойиб ўйин кўрсатган ярим ҳимоячи Жеймс Уорд-Проузни ўз жамоасига таклиф қилишга мажбур эди.
"Уорд-Проуз бу мавсумда мунтазам ўйнамоқда ва унинг статистикаси ўзи ҳақида гапиради, аммо унинг ўрнига Саутгейт ҳатто ўйнамайдиган одамларни чақирмоқда. Бу ақлдан озиш. Биламан, Англияда сифатли футболчилар кўп, аммо агар клубда ўйнамасангиз, терма жамоага чақирилмаслигингиз керак", - дея Антонионинг сўзларини келтирмоқда Daily Mail.
Жеймс Уорд-Проуз “Вест Хэм” сафида 9 та ўйинда майдонга тушиб, 2 та гол урди ва 6 та голли узатмани амалга оширди.
