Шотландия футбол ассоциацияси Европа футбол ассоциациялари иттифоқидан (УЕФА) шотландиялик ярим ҳимоячи Скотт Мактоминей томонидан Испания билан Евро-2024 саралаш босқичи А гуруҳи 7-турида урилган гол бўйича тушунтириш сўради. Бу ҳақда Daily Mail нашри хабар бермоқда.
Эслатиб ўтамиз, ўйиннинг 60-дақиқасида Мактоминай тўғридан-тўғри жарима зарбасини амалга оширган, аммо бу голни ВАР кўриб чиқиб, учрашув бош ҳаками томонидан бекор қилинганди. Голнинг бекор қилинишига дастлаб ҳужумдаги қоидабузарлик сабаб бўлган бўлса, кейинчалик ҳакам ўша эпизодда офсайд қайд этгани маълум бўлди.
Учрашув Альваро Мората ва Ойан Сансетнинг голлари эвазига испанларнинг 2:0 ҳисобидаги ғалабаси билан якунланди. 2024 йилги Европа чемпионати саралаш босқичидаги бешта ўйиндан сўнг Испания терма жамоаси 12 очко жамғариб, “А” гуруҳи турнир жадвалида иккинчи ўринда бормоқда. Шотландия терма жамоаси саралашнинг олти ўйинида 15 очко жамғариб, биринчи ўринда бормоқда.
