Малагадаги мағлубият, “Реал”нинг 16 йил ичида биринчи марта “Барселона”дан 16 очколик фарқ билан ортда қолиши каби воқеалар Жозе Моуриньонинг бошқа бир қарори соясида қолиб кетди. Бутун Испания, балки Европа, “Реал” ва Испания терма жамоаси сардори Касильяснинг захирада қолдирилганини муҳокама қилмоқда.

Энг қизиғи, Жозе бу қарорни шунчаки айни пайтда Аданнинг Касильясдан яхшироқ ҳолатда экани билан изоҳлаган. Икер Касильяс матбуотда мураббийни оқлаб чиққан бўлса-да, “Реал” Касильясга рақобат қила оладиган янги дарвозабон излаши мумкинлиги ҳақида гап сўзлар оловни бадтар авж олдирмоқда. Жозенинг бундай қарорларининг замирида аслида клубдаги бошқарувни бой бермаганини кўрсатишми ёки ички муҳитнинг издан чиқишими, аниқ гаплар йўқ, аммо натижа ва ўйиннинг пасайиб бораётгани ҳақиқат. Каталонияда 720 минг нусхада чоп этиладиган “Спорт” газетаси эса қизиқ талқинни илгари сурмоқда.

Газета муқовасида Жозе Моуриньонинг расми ва “Мени истеъфога чиқар” маъносидаги тагсўз берилган. Пастроқда эса, Мадридда бўлаётган турли воқеалар сюжетининг сериалга айланиб кетаётгани эслаб ўтилган. Касильянинг ўзининг захирада қолдирилиши мумкинлигини сеза бошлагани, Перес байрамдан кейин жамоа сардорлари билан учрашмоқчи бўлаётгани, Криштианунинг гуёки “МЮ” га қайтмоқчи бўлаётгани ҳақидаги гап сўзлар шулар жумласидандир.

Газета саҳифаларида эса Жозенинг янги ўйинида Касилья энг сўнгги қурбон сифатида эътироф этилмоқда, маълумки, Хорхе Вольдано, Зайниддин Зидан, жамоа врачи Эрнандес, ўринбосарлар мураббийи Алберто Торил айнан португалиялик мураббий туфайли “Реал”даги мавқеларидан айрилгандилар. Жамоанинг иккинчи сардори Серхио Рамос ҳам мавсум бошида сабабсиз захира ўриндиғига ўтқазилганди. Аввалги қарорлар Жозенинг клубда яккаҳокимлик ўрнатишга бўлган уриниш деб баҳоланган бўлса, энди бошқа мотивация ҳам таҳсин қилинмоқда – тезроқ “Реал”дан ҳайдалиш ва АПЛ га қайтиш.

Гап шундаки, мабодо Жозе Моуриньо муддатидан олдин истеъфога чиқариладиган бўлса, компенсация сифатида клубдан 20 миллион миқдоридаги тўловга эга бўлиши мумкин