Кеча пойтахтимизнинг «Яккасарой» ресторанида «Бунёдкор» футбол клубини тақдирлаш маросими бўлиб ўтди. Бу ҳақда клуб расмий сайти хабар тарқатди.

Ортда қолаётган 2012 йилги футбол мавсуми «Бунёдкор» футбол клуби тарихида ўчмас из қолдирган ҳолда ёдда қолади. Боиси «қалдирғочлар» чемпионатда кумуш медалларга эга чиқишган бўлса, Ўзбекистон кубоги баҳсларида ғолибликни қўлга киритишди. Қитъамизнинг клублар ўртасидаги энг нуфузли турнири – Осиё Чемпионлар лигаси турнирида илк бор футболи анчайин ривож топган Шарқий минтақада иштирок этишига қарамасдан ярим финалга қадар етиб бордилар. Ушбу муваффақиятли мавсумни муносиб нишонлаш мақсадида жамоа аъзолари, клуб раҳбарияти, ҳомийлар, ҳамкорлар ва «Бунёдкор» ФКга бефарқ бўлмаган яқин инсонлар бир дастурхон атрофида жамул-жам бўлишган ҳолда «қалдирғочлар»ни тақдирлаш маросимида иштирок этишди.

Тантанали маросимда Ўзбекистон футбол федерацияси президенти Мираброр Усмонов, профессионал футбол лигаси бош директори Фарҳод Магометов ҳамда «Бунёдкор» ФК президенти Тўлаган Жўраев футболчиларга кумуш медаллар, дипломлар ва Ўзбекистон кубогини топширишди.

Шунингдек, «Ўзбекнефтегаз» миллий холдинг компанияси ОАЖ раҳбари Шокир Файзуллаевнинг жамоа аъзолари томон битилган табрик мактуби ҳам ўқиб эшиттирилди ҳамда «Бунёдкор» ФКга замонавий янги автобус совға қилинди.