Суперлига 24-туридан ўрин олган «Пахтакор» – «Нефтчи» (1:1) учрашувидан сўнг меҳмонлар бош мураббийи Рўзиқул Бердиев ўз фикрларини билдириб ўтди.

«Учрашув тенг курашлар остида ўтди. Лима ўз вазиятини голга айлантирганида натижа биз учун яхши бўларди.

Чемпионлик учун курашаётган икки жамоа ўзаро тўқнаш келди. Ўйлашимча, кураш ҳали давом этади. Бугун футболчилардаги толиқиш ўз сўзини айтди. Мезбонлар бизга қараганда енгилроқ ҳаракат қилди.

Шу сабабли, биринчи таймда ҳам, иккинчисида ҳам ҳимояланишга мажбур бўлдик. Аслида бугунги режамиз ҳам шундай эди. Кўпроқ ҳимояланиб, қарши ҳужумларга эътибор қаратган эдик. Буни биринчи бўлимда амалга оширдик, аммо иккинчисида чарчоқ кузатилди.

Биз Суперлигани қурбон қилганимиз йўқ. Натижа ҳам биз учун ёмон бўлмади. Тақвимимиз жуда ҳам зич. Чарчоқ сабабли, натижани биринчи ўринга қўйиб, тежамкор ўйинга интиляпмиз. Ҳозирги ҳолатимизда кучли босим, юқори темпда ҳаракат қила олмаймиз», – деди Бердиев.