Испания чемпионатининг 12-тури доирасида "Реал Сосьедад" клуби ўз майдонида "Барселона"ни қабул қилди. Мезбонлар учрашувнинг дастлабки 2 дақиқасида жуда хавфли вазиятларни юзага келтирди. Аммо Марк-Андре тер Штеген маҳорат намойиш этиб, жамоасини голлардан қутқарди.

16-дақиқада ҳам Кубо томонидан йўлланган зарбани "Барса" дарвозабони бартараф этди. Орадан 3 дақиқа ўтиб эса Гави ўз имкониятини йўққа чиқарди. 32-дақиқада эса тер Штегеннинг хатоси қимматга тушиши мумкин эди. Қанотдан йўлланган зарбани германиялик посбон ушлаб қола олмади. Баскларнинг такрорий зарбасини ҳимоячилар бартараф этишди.

"Сосьедад" иккинчи бўлимда ҳам устунликка эришди. Кубо эса жамоа ўйинини бошқарди. "Барселона" эса савияли ҳужум ташкил этишга қийналди. Хави жамоаси ниҳоят 90-дақиқага келиб уйғонди. Дастлаб, Араухо олис масофадан йўллаган кучли зарбани Ремиро қайтарган бўлса, орадан 1 дақиқа ўтиб Гави яккама-якка вазиятда дарвозабонни доғда қолдира олмади. Яна Ремиро қаҳрамонга айланди. 90+3-дақиқада эса Гюндоганнинг узатмасидан кейин Араухо бош билан дарвозани забт этди. Ҳакамлар дастлаб офсайд туфайли голни бекор қилишди, аммо ВАР офсайд йўқлигини таъкидлаб, голни инобатга олди.

Шу тариқа, "Барса" йирик ҳисобда мағлубиятга учрашуви мумкин бўлган ўйинда ғалабани илиб кетди ва ўз очколарини 27 тага етказган ҳолда Ла лига жадвалида 3-ўринга кўтарилиб олди. "Реал Сосьедад" эса 19 очко билан 6-поғонага тушиб қолди.

Испания чемпионати, 12-тур
Реал Сосьедад – Барселона 0:1 (0:0, 0:1)
Гол: 0:1 – 90+3 Араухо.
Реал Сосьедад – Ремиро, Траоре (Элустондо, 63), Ле Норман, Субельдия, Муньос, Мендес, Мерино, Субименди, Кубо, Ойарсабаль (Фернандес, 84), Барренечеа (Чо, 79).
Барселона – тер Стеген, Жоау Канселу (Рафинья, 69), Мартинес, Кунде, Араухо, Бальде, Гюндоган, Гави, Лопес (Ферран Торрес, 57), Жоау Феликс (Ямаль, 69), Левандовски (Педри, 57).
Огоҳлантиришлар: Жоау Феликс (49), Мендес (49), Мартинес (60), Субельдия (74), Субименди (84), Гави (86).