Ispaniya chempionatining 12-turi doirasida "Real Sosyedad" klubi o‘z maydonida "Barselona"ni qabul qildi. Mezbonlar uchrashuvning dastlabki 2 daqiqasida juda xavfli vaziyatlarni yuzaga keltirdi. Ammo Mark-Andre ter Shtegen mahorat namoyish etib, jamoasini gollardan qutqardi.

16-daqiqada ham Kubo tomonidan yo‘llangan zarbani "Barsa" darvozaboni bartaraf etdi. Oradan 3 daqiqa o‘tib esa Gavi o‘z imkoniyatini yo‘qqa chiqardi. 32-daqiqada esa ter Shtegenning xatosi qimmatga tushishi mumkin edi. Qanotdan yo‘llangan zarbani germaniyalik posbon ushlab qola olmadi. Basklarning takroriy zarbasini himoyachilar bartaraf etishdi.

"Sosyedad" ikkinchi bo‘limda ham ustunlikka erishdi. Kubo esa jamoa o‘yinini boshqardi. "Barselona" esa saviyali hujum tashkil etishga qiynaldi. Xavi jamoasi nihoyat 90-daqiqaga kelib uyg‘ondi. Dastlab, Arauxo olis masofadan yo‘llagan kuchli zarbani Remiro qaytargan bo‘lsa, oradan 1 daqiqa o‘tib Gavi yakkama-yakka vaziyatda darvozabonni dog‘da qoldira olmadi. Yana Remiro qahramonga aylandi. 90+3-daqiqada esa Gyundoganning uzatmasidan keyin Arauxo bosh bilan darvozani zabt etdi. Hakamlar dastlab ofsayd tufayli golni bekor qilishdi, ammo VAR ofsayd yo‘qligini ta’kidlab, golni inobatga oldi.

Shu tariqa, "Barsa" yirik hisobda mag‘lubiyatga uchrashuvi mumkin bo‘lgan o‘yinda g‘alabani ilib ketdi va o‘z ochkolarini 27 taga yetkazgan holda La liga jadvalida 3-o‘ringa ko‘tarilib oldi. "Real Sosyedad" esa 19 ochko bilan 6-pog‘onaga tushib qoldi.

Ispaniya chempionati, 12-tur
Real Sosyedad – Barselona 0:1 (0:0, 0:1)
Gol: 0:1 – 90+3 Arauxo.
Real Sosyedad – Remiro, Traore (Elustondo, 63), Le Norman, Subeldiya, Munyos, Mendes, Merino, Subimendi, Kubo, Oyarsabal (Fernandes, 84), Barrenechea (Cho, 79).
Barselona – ter Stegen, Joau Kanselu (Rafinya, 69), Martines, Kunde, Arauxo, Balde, Gyundogan, Gavi, Lopes (Ferran Torres, 57), Joau Feliks (Yamal, 69), Levandovski (Pedri, 57).
Ogohlantirishlar: Joau Feliks (49), Mendes (49), Martines (60), Subeldiya (74), Subimendi (84), Gavi (86).