Rodrining «Manchester Siti»dan «Real» klubiga o‘tishdan bosh tortganiga «Madrid» rahbariyati qanday munosabat bildirgani ma’lum bo‘ldi.

AS nashri xabar berishicha, futbolchi «Barselona»ga o‘tish bo‘yicha yakuniy qaror qabul qilgan va bu haqda «Real» rahbariyatini rasman xabardor qilgan.

Rodri «Real» rahbariyati bilan muloqotlarida klubga doimo chuqur hurmat bilan munosabatda bo‘lgan, biroq qaroridan hech qachon to‘liq ishonch hosil qilmagan. Bu esa madridliklar rahbariyatini xavotirda ushlab turgan.

«Real»da klub bilan shartnoma imzolashi uchun futbolchi o‘z qarorining to‘g‘riligiga mutlaqo ishonch hosil qilishi kerak, deb hisoblashadi. Rodri esa hech qachon bunday ishonchni namoyish etmagan. Shu sababli madridliklar uning tanlovini tushunish va hurmat qilishlarini bildirishgan.

Rodri bir necha kun avval bo‘lib o‘tgan so‘nggi suhbatda «Barselona»ni tanlashining sabablarini tushuntirgan. Futbolchi jamoaning o‘yin uslubi, Xosep Gvardiolaning qoldirgan merosi hamda so‘nggi yillarda Ispaniya terma jamoasida birga o‘ynagani tufayli «Barselona» futbolchilari bilan yaqinroq munosabatlarga ega ekanini ta’kidlagan.

«Real» Rodrining qarorini qabul qilgan va unga tanlagan yo‘lida omad tilagan. Klub ushbu vaziyatni katta muammoga aylantirmagan. Shu bilan birga, madridliklar Rodrini futbol mahorati, xarizmasi, yetakchilik fazilatlari va Ispaniya terma jamoasi uchun ahamiyati tufayli juda qiziq futbolchi deb hisoblashgan.

Avvalroq Rodri «Barselona»ga o‘tishga rozilik bergani ma’lum bo‘lgan edi. Futbolchining agenti ham bu ma’lumotni tasdiqlagan.