"Бунёдкор"нинг 2013 йилдаги биринчи хорижий йиғини амирликларда давом этмоқда.
Жамоа аъзолари Миржалол Қосимов бошчилигида янги мавсумга тайёргарлик кўришмоқда. Ҳозирги машғулотлар олдинда турган узун ва қийин мавсумга пойдевор вазифасини ўтаб беради, десак муболаға бўлмайди.
Илк йиғин бўлганлиги ҳамда футболчилар энди-энди тикланиш машқларини бажаришаётгани учун дастлабки назорат учрашувларидаги спарринг рақиблар сифатида у қадар кучли бўлмаган жамоалар танланган. Ҳозир энг асосийси – натижа эмас, балки чизиқлар ўртасидаги боғлиқликни кучайтириш ва футболчилар бир-бирларини осонгина тушунишларини таъминлаш. 9 январь куни “қалдирғочлар” Саудия Арабистони про-лигаси иштирокчиси билан ўртоқлик учрашувида майдонга тушишади.
Йиғин якунида эса бир мунча кучлироқ бўлган – Харьковнинг “Металлист” клуби билан куч синашилади. Украиналиклар февраль ойида давом эттириладиган УЕФА Европа лигасига тайёргарлик кўришмоқда. Шу боисдан ҳам 15 январь куни бўлиб ўтадиган баҳс анчайин қизиқарлироқ ўтиши кутилмоқда.
