Голландиянинг "ПСВ" клуби собиқ президенти Роб Вестерхов "Олтин тўп"нинг тўрт карра соҳиби Лионель Месси унинг жамоасида ижара асосида ўйнаши мумкин бўлганлигини сўзлаб берди.

«Гап 2005 йилнинг баҳори ҳақида кетмоқда. Менинг "Барселона" президенти Жоан Лапорта билан алоқам яхши эди. Бир куни, G-14 мажлисларининг бирида у менинг олдимга келиб, Месси ҳақида гап очди. Лапорта уларда Месси деган келажаги порлоқ, ёш йигит болигини, аммо ўша пайтдаги Испанияда амалда бўлган қоидага кўра, у "Барселона"да ўйнай олмаслигини, шунинг учун уни бизга ижарага бермоқчилигини айтди».

«У пайтда "ПСВ"нинг салоҳияти яхши эди. Мураббийимиз Гус Хиддинк эди, биз мамлакат чемпионлигини қўлга киритиб, чемпионлар лигасида яримфиналга қадар етиб келган эдик. Бу таклифни клубда муҳокама қилдик, ҳамма рози бўлди, бироқ, кейин Лапорта қўнғироқ қилиб, техник ходимлар бунга қарши бўлишганини айтди. Менинг тушунишимча, Франк Раайкард ва Хенк тен Кателар Мессининг Голландияга кўчиб ўтишига қарши бўлганлар. Лапорта ва Чики Бегиристайн рози бўлган бўлсаларда, улар буни ёмон ғоя деб ҳисоблаганлар», - дея Вестерхофнинг сўзларини келтиради чет эл ОАВ.