"Галатасарой" ва "Фенербахче" ўртасидаги Туркия Суперкубоги учрашуви кейинроққа қолдирилгани ҳақида клублар ўзларининг ижтимоий тармоқларида хабар беришди.
Учрашув Саудия Арабистонида 29 декабрь, жума куни бўлиб ўтиши керак эди, бироқ ўйин старт ҳуштаги янграшига 10 дақиқа қолганида бекор қилинди. Маълум қилинишича, мусобақанинг бекор қилинишига футболчиларга Туркия Республикаси асосчиси Мустафо Камол Отатурк тасвири туширилган футболкаларни кийиш ва унинг шиори ёзилган баннерларни кўрсатиш тақиқлангани сабаб бўлган.
Ҳар икки жамоа Туркия футбол федерацияси билан биргаликда Саудия Арабистони расмийлари билан келиша олмагани учун майдонга тушишдан бош тортган.
“Бешиктош” ўйинни ўз стадионида ўтказишга тайёрлигини маълум қилди.
“Бизнинг эшикларимиз очиқ! Жумҳуриятимизнинг 100 йиллиги шарафига ўтказиладиган Суперкубок финалини ўтказиш учун “Отатурк” мухлисларини Туркия байроқлари остида “Долмабахче” стадионига келишларини кутамиз”, — дейилади клуб хабарида.