"Galatasaroy" va "Fenerbaxche" o‘rtasidagi Turkiya Superkubogi uchrashuvi keyinroqqa qoldirilgani haqida klublar o‘zlarining ijtimoiy tarmoqlarida xabar berishdi.

Uchrashuv Saudiya Arabistonida 29 dekabr, juma kuni bo‘lib o‘tishi kerak edi, biroq o‘yin start hushtagi yangrashiga 10 daqiqa qolganida bekor qilindi. Ma’lum qilinishicha, musobaqaning bekor qilinishiga futbolchilarga Turkiya Respublikasi asoschisi Mustafo Kamol Otaturk tasviri tushirilgan futbolkalarni kiyish va uning shiori yozilgan bannerlarni ko‘rsatish taqiqlangani sabab bo‘lgan.

Har ikki jamoa Turkiya futbol federasiyasi bilan birgalikda Saudiya Arabistoni rasmiylari bilan kelisha olmagani uchun maydonga tushishdan bosh tortgan.

“Beshiktosh” o‘yinni o‘z stadionida o‘tkazishga tayyorligini ma’lum qildi.

“Bizning eshiklarimiz ochiq! Jumhuriyatimizning 100 yilligi sharafiga o‘tkaziladigan Superkubok finalini o‘tkazish uchun “Otaturk” muxlislarini Turkiya bayroqlari ostida “Dolmabaxche” stadioniga kelishlarini kutamiz”, — deyiladi klub xabarida.