Madridning «Real» klubi prezidenti Florentino Peres «Bavariya» vingeri Maykl Olisening shov-shuvli transferini amalga oshirishni orzu qilmoqda.
Jurnalist Xosep Pedrerol qiziqarli voqea haqida gapirib berdi: «qaymoqranglilar» muxlisi «Bavariya» rahbari Gerbert Xaynerning ko‘z o‘nggida Peresdan Oliseni sotib olishni so‘ragan. Florentino o‘zini yo‘qotib qo‘ymay, myunxenliklar prezidentiga o‘girilgan va shu zahoti: «Buni eshitdingizmi? Dahshatli bosim, shunday emasmi? Ertami-kechmi uni menga sotishingizga to‘g‘ri keladi», — degan.
«Bavariya»da Maykl Olise hech qanday pulga sotilmasligini bir necha bor ta’kidlashgan. Mish-mishlarga ko‘ra, «Real» Fransiya terma jamoasining 24 yoshli yulduzi uchun 200 million yevrodan ko‘proq mablag‘ taklif qilishga tayyor.
