“Бунёдкор” футбол клуби Биринчи вице-президенти – Бош директори вазифасини бажарувчи Бахтиёр Бобоев айни пайтда Қатар пойтахти Доҳа шаҳрида бўлиб турибди.

Европа клублар ассоциацияси (ECA) қўмитаси “Бунёдкор” футбол клубини ўзининг навбатдаги йиғилишига таклиф этганлиги ҳақида хабар бериб ўтгандик. Ушбу тадбирда иштирок этиш учун “Бунёдкор” ФК Биринчи вице-президенти – Бош директори вазифасини бажарувчи Бахтиёр Бобоев Доҳага жўнаб кетган.

ECAнинг бу сафарги йиғилиши Қатар мамлакатида ташкил этилмоқда. Ушбу анжуманга “Бунёдкор”ни таклиф этишдан мақсад эса Европа вакилларининг бошқа қитъаларда фаолият юритаётган етакчи клублар томонидан амалга оширилаётган ишлар билан яқиндан танишиш ва улар билан тажриба алмашишдир. Ушбу тадбир “қалдирғочлар” учун ҳам анчайин фойдалидир. Жаҳон миқиёсида ўз ўрнига эга бўлишга интилаётган “Бунёдкор” Европа гранд клубларининг иш сиёсатидан ўзига керакли бўлган андозаларни олиши ва улардан тўғри хулоса чиқариши жамоамиз инфратузилмасини янада мустаҳкамлашга омил бўлади.

Ушбу тадбир доирасида йиғилиш иштирокчилари Испания ва Уругвай терма жамоалари ўртасидаги ўртоқлик учрашувини ҳам бевосита кузатиш имкониятига эга бўладилар.