Кеча Туркияда иккинчи назорат учрашувини ўтказган "Насаф" футболчилари 14 карра Польша чемпиони “Гурник” жамоасига мағлуб бўлишди.

Учрашувни вакилларимиз жуда фаол бошлашди. Биринчи бўлим ўрталарига келиб бурчакдан узатилган тўпни Ҳамза Каримов боши билан рақиб дарвозасига аниқ йўллаб, ҳисобни очди. Бўлим тугашига беш дақиқа қолганида Копач мувозанатни тиклади.

Иккинчи бўлимда “Насаф” устози бир қатор ўзгаришларни амалга ошириб, майдонга ёш футболчиларни туширди. Натижада ўйин тугашига беш дақиқа қолганида польшалик футболчилар ғалаба тўпини киритишга муваффақ бўлишди.

— Бу сафарги ҳам сўнгги дақиқаларда ўз дарвозамиздан тўп олиб чиқишга мажбур бўлдик, — дея ўйин ҳақидаги фикрларини билдирди “Насаф” устози. — Аммо назорат ўйинида натижа муҳим эмас, балки таркибни шакллантириш асосий мақсад бўлади. Иккинчи бўлимда таркибда бир нечта ёш футболчиларни синаб  кўрдик. Тўғри, уларга бироз тажриба етишмади. Шу боис охирги беш дақиқада дарвозамиздан тўп ўтказиб юбордик.

“Насаф” футболчилари бу учрашувда қуйидаги таркибда ҳаракат қилишди:

Михаил Наумов – Алишер Юсупов, Ботир Қораев, Ҳамза Каримов, Ботир Қораев, Лазиз Убайдуллаев, Эркин Бойдуллаев, Артур Геворкян, Суҳроб Неъматов, Фарруҳ Сайфиев, - Илҳом Шомуродов.
Иккинчи бўлимда майдонга тушганлар: Элдор Бойматов, Мирзакамол Камолов, Раҳматилла Бердимуродов, Мирзамурод Жўрабоев, Кенжа Тўраев, Шуҳрат Муҳаммадиев, Зоҳид Абдуллаев.

Таъкидлаш жоизки, “Насаф” футболчилари кетма-кет уч йилдан буён Анталияда “Гурник” футболчилари билан назорат учрашувини ўтказиб келишмоқда. 2011 йилда қаршилик футболчилар 3:1 ҳисобида ғалабага эришган бўлишса, 2012 йилда ҳам 1:0 ҳисобида “насаф”чилар рақибни доғда қолдиришганди.