Португалияда дзюдо бўйича ўтказилган Гран-при мусобақасида дунёнинг 90 мамлакатидан келган 624 нафар дзюдочи медаллар билан биргаликда, рейтинг очколари учун курашди. Унда Ўзбекистон терма жамоаси аъзолари 2 олтин ва 1 кумуш медални қўлга киритди.
Мусобақанинг эркаклар ўртасидаги 60 килограммгача вазн тоифасида Дилшод Баратов, вазни 52 килограммгача бўлган аёллар орасида эса Диёра Келдиёрова барча рақибларини енгиб олтин медални қўлга киритди. Шунингдек, 70 килограмм вазн тоифасида иштирок этган Гулноза Матниёзова кумуш медалга сазовор бўлди. Обидхон Нўмонов (-73 кг.) ва Нурбек Муртазоев (-81 кг.) турнирни кучли бешликда якунлади.
Афсуски, ушбу Гран-прида ҳамюртимиз Давлат Бобонов (-90 кг) тайёргарлик машғулоти жараёнида кичик жароҳат олгани боис иштирок этмади.
Мазкур натижалардан сўнг, Диёра Келдиёрова ҳамда Дилшод Баратов Олимпиада ва жаҳон рейтингининг 700, Гулноза Матниёзова эса 490 очкосига эга бўлди. Обидхон Нўмонов ҳамда Нурбек Муртазоев эса ушбу мусобақада 252 рейтинг очкосини ўз ҳисобига қўшиб қўйди.
Шу тариқа, Ўзбекистон терма жамоаси 2 олтин ва 1 кумуш медаль билан умумжамоа ҳисобида иккинчи ўринни эгаллади. Умумжамоа ҳисобида Япония 2 тадан олтин ва кумуш ҳамда 5 бронза билан биринчи, Туркия эса икки олтин, бир кумуш жамғариб учинчи бўлди.
