Жорий мавсумда "Барселона"да ижара асосида ўйнаётган "Атлетико Мадрид" вингери Жоау Феликс "кўк-анорранглилар" машғулоти вақтида ўнг тўпиғидан жароҳат олди, шу сабабли у тўрт ҳафтани ўтказиб юбориши мумкин. Бу ҳақда журналист Тони Хуанмарти хабар берди.
Манбанинг таъкидлашича, португалиялик футболчи 21 февраль куни бўлиб ўтадиган "Наполи" билан Чемпионлар лигаси 1/8 финалининг биринчи ўйинида иштирок эта олмаслиги эҳтимоли катта.
Эслатиб ўтамиз, жорий мавсумда Феликс барча турнирларда 28 та ўйинда қатнашиб, 7 та гол ва 5 та голли узатмага муаллифлик қилган. Футболчининг "Атлетико" билан амалдаги шартномаси 2029 йилнинг ёзига қадар мўлжалланган. Transfermarkt порталида берилган маълумотларга кўра, футболчининг бозор қиймати 40 миллион еврони ташкил қилади.
