Хабарингиз бор, эртага ОФК Чемпионлар лигаси нимчорак финал биринчи ўйини доирасида жамоамиз Саудия Арабистонининг “Ал-Иттиҳод” клубига қарши баҳс олиб боради.

Бугун мазкур ўйин олдидан учрашувнинг ташкилий масалаларига бағишланган йиғилиш ўтказилди. Унда бўлажак беллашув масъуллари, ҳар икки иштирокчи жамоалар, “Марказий” стадион вакиллари, Наманган вилояти тартибни сақлаш идоралари ҳамда тиббиёт соҳаси масъуллари иштирок этишди.

Йиғилишда учрашув комиссари Минду Доржи ва ўйин назоратчиси Ясер Халил Иброҳим Абдулла Тулефатлар учрашувнинг ташкилий жиҳатлари юзасидан барча зарур маълумотларни тақдим этишди.

Шунингдек, эртанги ўйинда жамоалар қандай рангдаги либосларда майдонга чиқиши ҳам аниқлаб олинди. Унга кўра, “Навбаҳор” эртага тўлиқ кўк рангли либосда майдонга чиқади. Саудиялик футболчилар эса оқ рангдаги формада ҳаракат қилишади.

Эслатиб ўтамиз, “Навбаҳор” – “Ал-Иттиҳод” учрашуви 15 февраль куни соат 19:00да Намангандаги “Марказий” стадионида бўлиб ўтади.

“Навбаҳор” ПФК матбуот хизмати.