Олти карра паралампия ўйинлари ғолиби, 2012 йилги Лондон Олимпиадаси иштирокчиси, югурувчи Оскар Писториус ўз қаллиғи Рева Стенкампни ўлдирганини тан олди. Писториуснинг айтишича, у Стенкампни хатолик туфайли – уни ўғри деб ўйлаб отиб қўйган. Спортчининг кўрсатмасини суд маҳкамаси вақтида унинг адвокати ўқиб эшиттирган. Бу ҳақда, Associated Press ахборот агентлигига асосланиб, «Лента.Ру» хабар бермоқда.
Стенкамп 14 февралга ўтар кечаси Писториуснинг уйида ўлдирилган. Спортчининг тушунтиришча, у уйғонган ва ваннахонадаги шовқинни эшитган. Болалигида оёқлари тиззасигача кесиб ташланган югурувчи «уйимга ўғри тушди» деб ўйлаган. Писториуснинг қайд этишича, у ўзини ночор ҳис қилган, чунки оёқ протезлари ўрнатилмаган бўлган.
Ўзининг сўзларига кўра, спортчи шовқинни эшитиб, ваннахона эшигидан пистолет орқали ўқ узган. Писториуснинг айтишича, унга аввалроқ ўлим билан таҳдид қилишган, шунинг учун ҳам у ҳар доим кровати остида тўппонча сақлаб ётган.
Ўқ узганидан сўнг югурувчи Стенкамп ётоқда йўқлигини сезиб қолган. «Шунда мени қўрқув ва даҳшат қуршаб олди», – деди Писториус. Шундан сўнг у протезларини таққан, крикет ўйини битаси билан ваннахона эшигини бузиб кирган. У ерда Стенкампни топган ва аёл, Писториуснинг сўзларига кўра, унинг қўлига жон берган. Югурувчининг айтишича, у ўз қаллиғини ўлдирмоқчи бўлмаган.
Ўз кўрсатмаларини суд маҳкамасида эшита туриб, Писториус йиғлаб юборган, шундан сўнг судья қисқа танаффус эълон қилишга мажбур бўлган, дея хабар бермоқда Sky News.
Прокурор Жерри Нелнинг судда маълум қилишича, Писториус қасддан қотиллик қилишда айбланмоқда. Прокурорнинг сўзларига кўра, спортчида қотиллик учун сабаб бўлган, бироқ қандай сабаб ҳақида гап кетаётганига аниқлик киритилмаган. Нелнинг айтишича, Стенкамп спортчи билан тортишиб қолган ва Писториусдан қўрқиб, ваннахонага яшириниб олган.
26 ёшли Писториус 29 ёшли Стенкампга қарата тўртта марта ўқ узган – улар 2012 йил ноябридан бери учрашиб келишар эди. Полиция маълумотларига кўра, Писториус биринчи ўқ узишни ётоқхонанинг ўзида амалга оширган, шундан сўнг аёлни ваннахонагача қувлаб бориб, ёпиқ эшик ортидан Стенкампга ўқ узган. ОАВда, шунингдек, югурувчининг уйида спортда допинг сифатида ишлатиладиган анаболик стероидлар топилгани ва Писториусни допинг ёки наркотик модда истеъмол қилганми-йўқми, аниқлаш мақсадида қон таҳлили олиниши ҳақида хабарлар пайдо бўлганди.
«Устара тиғи устида югурувчи» лақабини олган Писториус пластикдан тайёрланган махсус протезларда югуради. У нафақат паралампиячиларнинг мусобақаларида, балки одатий мусобақаларда ҳам муваффақиятларга эришган. Хусусан, 2011 йили ЖАР терма жамоаси сафида енгил атлетика бўйича жаҳон чемпионати кумуш медалини қўлга киритган эди.