"Манчестер Сити" бош мураббийи Пеп Гвардиола бугун, 17 февраль куни бўлиб ўтадиган Англия чемпионатининг 25-туридан ўрин олган жамоаларнинг ўзаро ўйини олдидан "Челси"нинг ҳужумкор ярим ҳимоячиси Коул Палмернинг "шаҳарликлар"дан кетиши ҳақида гапирди.

"Икки-уч мавсумдан сўнг у ўтган мавсумга қараганда кўпроқ ўйин амалиётига эга бўлишни хоҳлади. Мен уни тўлиқ тушунаман. Агар Палмерда Фил Фоденга бошидан берган дақиқаларим бўлганида, Коул Палмер шу ерда бўларди - лекин мен унга ҳеч нарса бермадим. Бу менинг жавобгарлигим. Ўша пайтда мен бошқаларни танладим.

Биз доим ёш футболчилар қолишини истаймиз, аммо бу нормал ҳолат. Бир мавсумдан кейин бу яхши, иккинчи мавсумда, лекин учинчи мавсумда аллақачон "Йигитлар, мен ўйнашни хоҳлайман, захирада ўтиришни хоҳламайман" - дейишади. Бу одатий. Биз буни клуб сифатида тушунамиз. Бизга "Челси"дек ажойиб топ-клубдан таклиф тушди ва мен у учун жуда хурсандман. Бундай ҳолатлар барча клубларда бўлади.

Биз унинг маҳоратини билардик, аммо бу мавсумда унинг таъсири жуда катта бўлди. Гап фақат гол ва голли узатмаларда эмас, сифатда. У "Челси"да ақл бовар қилмайдиган даражада ўйнамоқда", - деди Гвардиола.

Эслатиб ўтамиз, Палмер ўтган ёзда "Манчестер Сити"дан "Челси"га ўтган эди. Жорий мавсумда англиялик футболчи барча турнирларда 31 та ўйин ўтказиб, 14 та гол ва 9 та голли узатмани амалга оширди.