«Ҳоким Кубоги» мусобақасида «Мурас Юнайтед» «Андижон» U21 жамоасига қарши майдонга тушиб 3:1 ҳисобида ғалаба қозонди. Учрашувдан сўнг «Мурас Юнайтед» бош мураббийи Андрей Канчельскис «Андижон» матбуот хизматига қуйидагича фикр билдириб ўтди:

— Андрей Антанасович, учрашув ҳақида нималарни айта оласиз?
— Сифатли майдонда ўйинни ташкил қилиб беришгани учун раҳмат. Унгача бундай майдонда ўйнамаган эдик. Майдон қойилмақом даражада. «Навбаҳор»да ишлаганимда биз бу ерга келгандик. Ташкилотчиларга миннатдорчилик билдираман. Ўйин яхши ўтди, юқори савияда бўлди. Кучли жамоа ғалаба қозонди. Натижадан қониқдим. Гол ўтказиб юборган вазиятда бироз ўйинни бўшаштириб юбордик. Ҳар қандай ҳолатда ҳам ғалаба ёқимли. Иккала жамоани чиройли ўйин кўрсатишгани учун табриклайман. Асосийси, ҳеч ким жароҳат олмади.

— «Андижон» ёшлари сизда қандай таассурот қолдирди?
— Биз чемпионатга тайёргарлик кўряпмиз. Мавсум 29 март куни старт олади. Ўйинларда йигитларни текшириб оляпмиз. Асосий таркибни ҳам аниқлаб олмоқдамиз. Сизнинг жамоангиз ўйини ҳам менга ёқди. Ёш жамоа, ўзини кўрсатаётган ёш, яхши футболчилар бор экан. Улар бу ўйин орқали бизни бироз асабийлаштиришди. Айниқса, биринчи бўлимда. Умумий олганда, яхши ёшлардан йиғилган жамоа экан. Уларга чемпионатда омад тилайман.

«Андижон» матбуот хизмати.