"Бавария" бош мураббийи Томас Тухель мавсум охирида ўз лавозимини тарк этиши ҳақидаги хабарга изоҳ берди.
Эслатиб ўтамиз, ўтган дам олиш кунлари Бундеслигада мюнхенликлар ва етакчи “Байер” ўртасидаги фарқ 8 очкога етди.
"Биз ушбу мавсум охирида ҳамкорликни тўхтатишга келишиб олдик. Унгача мен ва мураббийлар штаби, албатта, максимал муваффақиятни таъминлаш учун қўлимиздан келганини қилишда давом этамиз", - деди Тухель "Бавария" расмий сайтига.
Бунгача Томас "Бавария" бошқарувида битта соврин - ўтган мавсумда Бундеслига чемпионлигини қўлга киритишга муваффақ бўлганди. Тухель "Барселона" бош мураббийи лавозимига даъвогарлик қилмоқда.
