Янги мавсум тадоригини кўраётган “Сеонгнам Илва Чунма” клуби тайёргарликнинг якуний қисмига киришди. Клуб қишки трансфер бозорида бир қанча муҳим савдоларни амалга оширди ва шу билан бирга баъзи футболчиларни сотиб юборишга ҳам улгурди.

Клуб Кей-Лиганинг бошқа клуби “Чонбук”дан химоячи Шим Ву Ён ва хужумчи Ким Хёнларни сотиб олган бўлса, Жордан Вилмар (“Кёнгнам”) ва Сервер Жепаров (“Аш-Шабоб”) каби хорижлик футболчилар ҳам харид қилинди. Шунингдек, сўнгги маълумотларга қараганда, ўтган мавсумда Москванинг ЦСКА клубида тўп сурган Ким Ин Сонг ҳам сеонгнамликлар машғулотларида иштирок этмоқда.

Кўпчилик “Сеонгнам Илва Чунма”нинг амалга оширган харидларини олқишлаган ҳолда сотиб юборилган футболчилар бўйича эътирозлар ҳам билдирмоқда. Айниқса, Жанубий Корея терма жамоаси аъзоси бўлган истеъдодли ярим ҳимоячи Юн Бит Гарамнинг Кей-Лигадаги асосий рақиблардан бўлган “Жежу Юнайтед”га сотиб юборилиши кескин танқидларга сабаб бўлди.

Жанубий Корея Кей-лигаси 1-турига 3 март куни старт берилади ва унда сеонгнамликларни “Сувон Самсунг Блюингиз” билан  қийин ўйин кутиб турибди. Унга қадар эса жамоа Хитойнинг “Чунгчин” ва Кей-лигада қатнашувчи “Анянг” ФК клублари билан ўртоқлик ўйинларини ўтказиши кутилмоқда.

Отабек Йўлдошев, Жанубий Корея, Сеул.