Мадриднинг "Реал" клуби ярим ҳимоячи Тони Кроос клуб билан шартномасини яна бир мавсумга узайтиришига ишонмоқда. Бу ҳақда инсайдер Фабрицио Романо хабар бермоқда.
Крооснинг "Реал" билан амалдаги шартномаси ёзгача амал қилади. Олдинроқ 34 ёшли футболчи Германия терма жамоасига қайтишини маълум қилганди - ёзда у уйдаги Европа чемпионатида иштирок этишни режалаштирмоқда.
2023/2024-йилги мавсумда Тони Кроос "Реал" сафида 34 та ўйинда майдонга тушди. Уларда ярим ҳимоячи битта гол урди ва еттита голли узатмани амалга оширди. Тони Кроос 2014 йилнинг ёзидан бери "Реал"да ўйнамоқда.
