“Наполи” ҳужумчиси Виктор Осимхен “Сассуоло”га қарши учрашувда (6:1) хет-трик қайд этди.

25 ёшли футболчи ўйиннинг 31, 41 ва 47-дақиқаларида рақиблар дарвозасига тўп киритди - эндиликда нигериялик футболчининг жорий Италия чемпионатида урган голлари сони 11 тага етди. Opta хабарига кўра, Осимхен афсонавий Диего Марадонадан кейин кетма-кет тўрт мавсумда А серияда ўн ёки ундан ортиқ гол урган биринчи "Наполи" футболчисига айланди. Тарих давомида бу ютуқга фақат уч киши эришган - биринчиси 30-йилларда чиқиш қилган Аттила Саллустро эди.

Ўтган мавсумда Виктор Осимхен 32 ўйинда 26 гол уриб, А сериянинг энг яхши тўпурари бўлганди. Форвард олдинги икки мавсумни 14 ва 10 та гол билан якунлаган.