Германия терма жамоасининг собиқ ярим ҳимоячиси Месут Ўзил ҳар доим “Ювентус”да ўйнашни орзу қилганини тан олди.

“Фаолиятим ва ўйнаш шарафига муяссар бўлган барча ажойиб клубларим билан фахрланаман. Фақат битта клуб етишмаётганди - "Ювентус". Бу менинг итальянча муҳаббатим”, — деб ёзди Ўзил ижтимоий тармоқдаги саҳифасида.

Эслатиб ўтамиз, Ўзил ўтган йилнинг март ойида футболчилик фаолиятини якунлаган эди. Немиснинг сўнгги клуби Туркиянинг "Истанбул Бешакшеҳир" жамоаси бўлган. Бундан ташқари, Ўзил "Шальке", "Вердер", "Реал", "Арсенал" ва "Фенербахче" клубларида ўйнаган. Ўзил бошқа футбол юлдузлари қатори 35 ёшдан ошган ва профессионал фаолиятини якунлаган футболчилар ўртасида бўлиб ўтадиган жаҳон чемпионатида иштирок этиши аввалроқ хабар қилинганди.